Studia Iusticia

სტუდია "იუსტიცია" იუსტიციის სამინისტროს მორიგი ინოვაციური პროექტია. ახალი პლატფორმა იუსტიციის სასწავლო ცენტრის ბაზაზე 2023 წელს დაარსდა.

სტუდიის მიზანია იუსტიციის სამინისტროს საქმიანობასთან დაკავშირებული თემების სრულყოფილი გაშუქება, საზოგადოების ინფორმირება ობიექტური და გადამოწმებული ინფორმაციით.

ეს არის პირველი განსხვავებული ფორმატის სატელევიზიო სტუდია, რომლის ბაზაზეც მომზადებული მასალები, სტუდია "იუსტიციის" სხვადასხვა პლატფორმაზე განთავსდება.

სტუდია "იუსტიცია" ერთ სივრცეში აერთიანებს სატელევიზიო სტუდიას, სამონტაჟო სივრცეს და ცენტრალურ საეთეროს. თანამედროვე ტექნიკური აღჭურვილობა შესაძლებლობას იძლევა, სტუდიამ სატელევიზიო სიგნალი ოპერატიულად მიიღოს და მისი ტრანსლირება სოციალურ მედიაში სხვადასხვა პლატფორმაზე უზრუნველყოს.

სტუდიის ბაზაზე მომზადდება უწყების საქმიანობასთან დაკავშირებული ახალი ამბები, გადაცემები და სიუჟეტები. შეიქმნება მაღალი ხარისხის სატელევიზიო პროდუქტი, რომელიც სოციალურ მედიაში სტუდია "იუსტიციის" ოფიციალურ გვერდებზე განთავსდება.