Muhabbatshoh Nasrullo

Муҳаббатшоҳи Насрулло (аз руи шиноснома - Насруллоев Маҳмадшоҳ) – сарояндаи хушовози тоҷик, 22-юми сентябри соли 1956 дар ноҳияи Қумсангир дар оилаи коргар ба дунё омадааст. Айни ҳол дар кӯчаи Сурхоби ноҳияи И. Сомонии шаҳри Душанбе истиқомат мекунад.

Муҳаббатшоҳи Насрулло хатмкунандаи Донишкадаи санъати ба номи М.Турсунзода (1981) мебошанд. Аз соли 1981 то 1986 дар Омӯзишгоҳи ҷумҳуриявии маданӣ-равшаннамоӣ ба ҳайси муаллим кор намудааст. Баъд дар Донишгоҳи омӯзгории ба номи С.Айнӣ ба ҳайси муаллими кафедраи созҳои мусиқӣ ба кор гузашта, то соли 2006 (то баста шудани кафедра) онҷо кору фаъолият намудааст.

Аз солҳои донишҷуӣ то ба имрӯз, Муҳаббатшоҳи Насрулло дар хизмати мардум буда ба эҷодиёти сурудҳои халқӣ ва панду ахлокӣ машғул аст. Аксарияти сурудҳои Муҳаббатшоҳ аз девони Хофизу Саъдӣ, Бедилу Шамси Табрезӣ ва дигар шоирони бузурги форсу тоҷик мебошанд.