Hordata Media

ዘሎናዮ መዋእል፣ ሓበሬታ ጎብለል ኩሉ ዓውድታት ብምዃን ዝቕልሶ ዘሎ መዋእል ኮይኑ፣ ኣብ’ታ ዝደቐቐት መለክዒ ግዜ፣ እልቢ ዘይብሉ ብዝሕን ዓይነትን ሓበሬታ ዝፈርየሉን ዝጋዋሓሉን ዘሎ እዋን እዩ። ኣብ’ዚ መኣዝን ከስሕት ዝክእል ናይ ሓበሬታ ማዕበል እዚ፣ መንእሰያት ቀዳሞት ተጸለውቲ ከም ምዃኖም መጠን፣ ካብ’ዚ ማዕበል ዝምእዘኑሉ ናይ ገዛእ ርእሶም ብሶላ የድልዮም። እዚ ድማ ኣብ ምህላኽ ፍርያት ሓበሬታ፣ ንቑሕን መማይን ኣገባብ ክጥቀሙ፣ ካብ ምህላኽ ሓሊፎም’ውን ናይ ገዛእ’ ርእሶም ሓበሬታዊ ሰነዳት ከፍርዩ የድሊ።
ነዚ ኣብ ግምት ብምእታው፣ መንእሰያት ናይ ትምህርቲ፡ ሓበሬታን ምዝንጋዕን ኣገልግሎት ንክረኽቡ፡ ዝተፈላለዩ ኣገባባት መራኸቢ ብዙሃን ብምጥቃም፡ ሓያል ጻዕሪ ከካይድ ጸኒሑሎ።
ከም መቐጸልታ ክካየድ ዝጸንሐ፣ ንመንእሰያት ቀንዲ ተዋሳእቲ ናይ ፍርያታት መዋእል ቴክኖሎጂ ሓበሬታ ናይ ምግባር ዕዩ፣ ብመገዲ ዩ-ትዩብ ንምድርዑ ንዝተገብረ መደብ፣ ኩሉ ዜጋ ብሕልፊ ድማ መንእሰያት፡ ክበጽሕዎን ተሳታፍነቶም ከረጋግጹን ትጽቢት ይግበር።
“HORDATA Media” ፣ ንባህግን ጥሙሕን መንእሰያት ዘዕግብ ብመንእሰያት ንመንእሰያት ዝዳሎ ብሉጽ መደባት እተእንግድ ሜድያ እያ። ብተወሳኺ ንኣእምሮ ዕድመ ቈልዑን ኮተቴን ዝበቕዑን፣ ናብ ቅኑዕ መኣዝን ዝመርሑን ሓበሬታዊ፡ ትምህርታውን ኣዘናጋዕን ትሕዝቶታት’ውን ኣለዋ።
በዚ ኣጋጣሚ፡ “ HORDATA Media” ናይ ድምጽኹም መቃልሒት፣ ናይ ተሞክሮታትኩም መለዋወጢት፣ ምንጪ ፍልጠት፣ መኽዘን ባህልን ምዝንጋዕን፣ መደረኽ መወራረሲት ታሪኽን ጅግንነትን፣ መኾስኮሲት ሃገራውነት ክትከውን ኣበርክቶኹም፡ ርእይቶታትኩም፡ ነቐፌታኹም ኮታ ኩሉ መድያዊ ተሳትፎኹም ክዓዝዝ ደጊማ ትጽውዕ።
ሆርዳታ ብመንእሰያት ንመንእሰያት!