【

今日財會特別會議其中一個section 係醫衞，我繼續跟進第三間醫學院嘅選址。睇返政府答覆，起新醫院其中一個考慮因素係選址嘅可達性。上年11月政府嚟立法會講牛潭尾發展，有張圖講咗第三間教學醫院嘅坐落位置，離最近牛潭尾站要行10幾分鐘，市民同醫護來回最少嘥半個幾鐘。當時我就好有意見，覺得一定要痴住嗰鐵路站先得。

今年2月我係立法會就再問醫衞局長點睇嗰位置，贊唔贊成要黐住鐵路站。當時局長就話我知，搭救護車嘅係最急需治療嘅病人，要優先考慮，喺選址上一定要確保救護車可以好方便咁入到醫院。我係好明白局長嘅立場，但我個睇法有少少唔同。

睇返最近3個年度，大約有3成嘅病人係經救護車入急症室。我覺得唔可以只為咗呢3成嘅病人，而放棄另外7成同萬幾個醫護人員於不顧。其實再諗真啲，兩個要求未必百分百對立架喎，政府係咪可以俾啲創意，又要馬兒好，又要馬兒不吃草呢？既然而家間醫院係新起、新規劃，而公路嗰啲仲係設計緊，我就係會上向局長提出嗰兩全其美嘅方法👉🏻醫院起係鐵路站隔離，然後喺主要公路起條隧道或者天橋🛣️，直駁入急症室。咁救護車又唔洗驚燈位、塞車等得耐，同時又方便到搭公交嘅市民同醫護。

🗣️ 局長就話好認同醫院嘅位置係好影響使用率，而我所擔心嘅全部都係佢哋嘅考慮因素。係醫療角度，最重視係啲急嘅病人，即係救護車，但可唔可以起條隧道或者天橋直駁入急症室，雖然唔係佢哋嘅專業，但可以向發展局提出呢個意見，將來都肯定會放入去考慮。

👉🏻 我好高興局長咁正面回應，大家試諗吓，一間醫院起好咗，大機會永世都唔會變，我係好怕用咗幾百億起好嘅嘢，但最後問題多多。點解凡事只可以有優次，唔可以有優優呢？國家成日都提醒我哋香港要用創新思維去處理舊問題，香港政府有三司十五局，以前多數係「河水不犯井水」、「多一事不如少一事」，但今日局長俾我嘅印象已經唔再係咁，會肯同其他政策局去傾同爭取，但呢個需要有好強嘅堅持，鍥而不捨咁游說其他政策局肯洗多少少錢。如果佢最後成功，咁就係我心目中少數可以打破傳統，去處理問題嘅局長。希望成個政府可以用呢個創新改革嘅思維去處事！