اجت ليلى العلي الأكبر .. يويلي واوچبت عنده | معين السباك - السيد جاسم الطويرجاوي

كُتِبتْ ومازالت ١٤٤٣ هـ
ليلة ٩ محرم ١٤٤٣ هـ

اجت ليله العلي الأكبر .. يويلي واوچبت عنده
تريد تشوف اصاويبه .. وجرح الضاهده اتشده

تريد اتشوف اصاويبه .. اجت ام الولد ليله
وصاحت وين زينب وين .. باالله وياي تچيله
وعن الشمس خل سكنه .. تجي بهمه تفييله
يعماته تعالن جاي
اجعدن هالولد وياي
بالله وي علي بهداي
اجعدنه وخلني .. احط خدي على خده

عماته وخواته الكل .. صاحن يم علي الأكبر
روح الولد خلصانه .. نجعده اشلون ما نگدر
يليله ينتبه خافن .. وجروحه عليه تسعر
گالت صدگ خلنه
نايم لا تجعدنه
خافنچن تلچمنه
الشمس والعطش وجروحه .. عليه من ينتبه شده

بالله لا تجعدنه .. وبعد لا نايحه اتنوحه
لما نشوف اصاويبه او لما انجلب اجروحه
بي ضنت رجه ويعيش .. يو لا گوضت روحه
بلچن بي رجه ويعيش
هدّه من الدهر چا ليش
وانخاه ويرد للجيش
الولد ما گالها الله .. يخلي والده وحده

حگها بلا فكر تحچي .. أم الولد مذهوله
وكلسا تنشد النسوان .. هذا ابني علي يوله
وين اهل الرحم تنده .. گطرة ماي جيبوله
وين البي رحم وينه
بگطرة ماي يلفينه
وليدي سوربة عينه
وانه امه وصدن ليه .. عفيه ام الولد جلده

زينب حچت وي ليله .. تگلها يَمْ علي بسچ
تره صواب ابن اخوي مچيد .. ومسني مثل ما مسچ
جريبه الگوم يا ليله .. لا لا ينسمع حسچ
خل نجري الدمع سكته
هذا يم علي الردته
حس ما ينسمع حته
اخوي وخوي حسين ما يقبل .. وبي ما يشتفي ضده

تگلها شلون اتجلد .. يبت المرتضى ومن گال
زين وبعد بيه روح .. وشوف ابني اعله هذا الحال
شگولن غير عالواحد .. عندي اويه الزلم رجال
ماني الدهر محني
كفن يالتلومني
ويه الولد خلني
أون وألطم على وليدي .. الذاب من العطش چبده

وبعد يا عمته تدرين .. ما عندي ولد غيره
واحد وانفگد مني .. وظلت خاليه الديره
هم انه ويلومنّي .. والله حيرتي حيره
عساني الكربله لا جيت
ولا بيها انبنالي بيت
راح ابني علي وظليت
اصك الراح فوگ الراح .. اگول الراح شيرده



الشاعر المرحوم: معين السباك
المصدر: سبائك السباك
بصوت الخطيب المرحوم: السيد جاسم الطويرجاوي

#كتبت_ومازالت
#حسينية_ابوطالب
حساب الحسينية على منصة الإنستقرام
@hussainyat.abutaleb
https://www.instagram.com/hussainyat.abuta...