Xhymshiti: Maskirovka në Prishtinë: Si Po Manipulohet Kosova para Zgjedhjeve?

Në këtë intervistë në NTV, unë flas hapur për realitetin e zymtë të fushatës zgjedhore në Kosovë, në prag të zgjedhjeve të 28 dhjetorit. Shpjegoj pse besoj se diskursi publik është vulgarizuar qëllimisht nga një pjesë e opozitës, përmes gjuhës rrugaçërore, primitivizmit politik dhe përpjekjes për të ndotur çdo debat serioz për të ardhmen e Republikës së Kosovës.

Flas për fenomenin e ish-krerëve të luftës që, sipas meje, fshihen pas flamurit të Ushtrisë Çlirimtare të Kosovës sa herë përballen me të vërtetat e hidhura të pasluftës, pasurinë, plaçkitjen, kapjen e shtetit dhe bashkëpunimin politik e ekonomik me interesat serbe. Sqaroj pse unë mendoj se plaçkitja, banditizmi dhe nënshtrimi i Kosovës ndaj Beogradit NUK janë karakter i UÇK-së, por abuzim me lavdinë e saj.

Në këtë bisedë analizoj edhe rolin e Listës Serbe në politikën e brendshme të Kosovës, si dhe debatin rreth moscertifikimit të saj nga Komisioni Qendror i Zgjedhjeve. Shpjegoj pse e shoh këtë subjekt si mjet të interesave të Beogradit brenda Kosovës dhe pse vendimet institucionale ndaj saj nuk duhet të lexohen thjesht si “teknikalitete”, por si pjesë e betejës për siguri kombëtare dhe sovranitet politik.

Në fund, ndaj pritshmëritë e mia për rezultatin e zgjedhjeve të 28 dhjetorit: pse mendoj se forcat politike që kanë treguar vullnet për ta shkëputur Kosovën nga kontrolli i Serbisë dhe për ta vënë shtetin në shërbim të qytetarëve meritojnë mandatin; dhe pse propaganda, gënjeshtrat dhe lufta psikologjike e organizuar nga “lagjja e Beogradit në Prishtinë” mbeten rreziku më serioz për demokracinë në Kosovë.

🗳️ Nëse të intereson kush po e tërheq Kosovën përpara, kush po e mban peng dhe pse këto zgjedhje janë shumë më shumë se thjesht votë, kjo intervistë është për ty.