بشير حمد شنان - وافيت قبل أمس في الديرة عجوز - جلسة صوت الهنا

الكلمات برعاية أبوعبدالله :


وافيت قبل أمس في الديرة عجوز
عليها وأشكالها اللعنه تجوز
ماتقرب أمرٍ خبيث الا تفوز
همها في العمر تحليل الحرام

قربت مني وقالت في ندم
هالطريق يودي لسوق الغنم
قلت أنا مدري سألي شخص فهم
وأبعدت عنها وتوسط الزحام

تابعتني والعيون مشبهرات
تركض بسرعه ورافعة العباة
قلت وش تبغين قالت لك وصاة
جارنا أبو فلان يهديك السلام

قلت هذا اللي تسمين أجهله
قالت تعرفه وتعرف من هله
بتعترف والا يلا نوصله
يظهر الكذاب منا في الكلام

قلت أنا والله غشيم في البلد
لاعرف شوارع ولا أعرف أحد
ويحلف لك إيمان برب الصمد
إني معك صادقٍ في ذا الكلام

قالت الأيمان عندك جاهزه
ولو نبغي ألفين حلفٍ بارزه
حجتك هذي قديمه وبايزه
يلا مشينا لايجينا الظلام

قلت أنا مواعد لي إنسان عزيز
وسط منفوحه ومن حول النشيز
بوصله أخشى أن موعدنا يبيز
ابعتذر منه وارجع لك قوام

قالت أصبر شف معايا أربع صور
حافظتها لك في جيبي من شهر
و أظهرت من بينهم صورة قمر
يبري الآلام ويزيل السقام

قامت بي الأرض والدنيا تدور
ودخلت بعد الزعل دنيا السرور
قربت مني وقالت في غرور
بتروح ولا تطول في الكلام

قلت أنا بمشي معك للي تبين
لو في طريقي ذياب جايعين
و إن ماكفى اليوم لو نقعد سنين
أنا تحت أمركم ياهل الغرام

قالت مشينا وخلك من بعيد
منشان في البيت إنسان عنيد
كل ماقلنا نسى عناده يزيد
قليل حشمه و مفقود إحترام

قلت أنا بقعد على هذا الرصيف
كله على شان من دمه خفيف
لو يكفي البرد ويجينا المصيف
مارحت حتى أشوفه لو كلام

راحت وفي ضرف ساعه عودت
وقربت مني وبيدها أشرت
قالت مشينا ترى اللمبه طفت
الجو صافي وشارعهم ظلام

أدخلتني بيت مثل المقبرة
أرضٍ وحيشه خلاوي مقفرة
الطوايق فاتحه ومكسرة
تشبه أعشاش تبنا للحمام

قلت ياخالة اذا عندك بساط
أرجوك هاتيه أحسن من البلاط
قالت ماخبر سوى هذا السماط
أصبر دقايق وتمشي في سلام

قلت أنا معاد أبي شي بتات
عجلي ناديلنا زين الصفات
قالت المذكور لاجى من الصلاة
ينام بدري علشان الدوام

قلت ياخالة أبي منك السماح
بروح للبيت وأرجع في الصباح
قالت لي أرجوك خلك من المزاح
بنوم أنا وأنت ياولد الكرام

سكت والنار في قلبي ولعت
وقلت أبي الدكان اباخذلي بكت
راحت وفي ضرف ساعه عودت
وجابت بكت KENT من عشرين عام

قالت وش الراي نرقا للبراد
قلت أنا فيما تشوفين السداد
واكشفت رأسٍ فقد ريح السواد
جعل ماهي في العوض أهل الوشام

قلت أنا مدام إنها لوحدها
ليه من رأس الدرج مادفها
و إن ماغشت في الخياشه ألفها
وإلى صحت لينها كومة عظام

بعدين فكرت في حل سليم
أرقى بلا غترة كني مقيم
واحلفها لها برب الزمزم والحطيم
إن تشفي جروح أهل الغرام

وفي إذنها قلت ياشمس النهار
القلب من شافك شب نار
وفي نفسي أقول يا ليت القطار
يقسمك نصفين يابنت الحرام

قامت تشاخر وأنا احسبها رقدت
وأثر اللعينة لرايي خططت
مقصودها تكتشفني وانجحت
قالت على وين قلت ابغى الطعام

قالت انا خابره باقي الفطور
من قبل قبل أمس ناشب في القدور
و إن تبغاه جبته في سرور
بمشي على رضاك ياولد الكرام

قلت أنا بالله دخيلك عجلي
ولاجيتي راس الدرج اتمهلي
وفي نفسي أقول يالله وصلني هلي
أعيش في النور من بعد الظلام

طالعت لجدارها لينه قريب
واخاف أطب معاد أطيب
طبيت والله يسر لي الصعيب
ومن بعدها تبت من طرد الغرام