A. QEDÎR EMEN - RÊÇA RAYWANEKÎ RA

RÊÇA RAYWANEKÎ RA

I
Binê tîja aşme de
Kîşta çepe ser de ez kewte yo
Hêdî-hêdî serê çimanê mi abi
Qeretuyê to awe ser o
Camê penceraya mi felqizîya
Çilkê awe, rîyê mi de cemedîyayî
Zimik ha zerqitnena na leşa mi
Fesala to, dêsê keyeyê mi neqişna
Awirê to serê lîlikê mi ra zinga
Hênîyê çimanê mi bîyo zik-ziwa
Vengê to goşanê mi de çinga
Mi rêça to zanabî,
Eger şîyayîş bo

II
Ez bîyo xerîbê keyeyê xo
Nameyê to, mezgê mi elawit
Şîyayîşê to nêşûno mi vîr ra,
Mi tedarikê xo zî dî
Û ez bîyo raywanê evîne,
Hingan barsê xo dayî
Mîlçikan refê xo firnayî
Morceleyan zî barê xo wenayî
Mi pêrarê xo kerdî vîndî
Eware-eware gêreno,
Ti nika ha ça ya?

III
Xingarê hewnî ra dest pêbi eyro
Mezgê mi şîpek de mendo hêsîr
Estareyî mi reyra bîyî bêhal
Mi ser ra pay vinderto rojgar
Û ez verê yew hênîyî de
Duş bîyo xeyalan
Yew hewesê korfehmî
Na zerrîya mi kerda puçe
Bêwext paweno.
Tîje rîyê xo kerdo tal,
Varna mi ser o germ û qîyal
Yeno çimanê mi ver meşîyayîşê to
Gelo kamî ra mendo no webal?
Vengêk ame:
-Agêre na sewda ra,
Agêre nê bîrê bêbinî ra.
La agêrayîş...
Ti mi ra asena,
Ti mi ra eyan a,
La nika,
Ti bîya yew xeyal.

IV
Mi gamêk eşte, biney şîyo aver
Lepê destê mi de yew a perperike
Vernîya mi gîrîyaye, ci birîya rayîr
Sereyê gişta mi de yew humalek
Mi verê xo tada yewna hetî ra
Dewam kerd yewna raywanîye
Mi sere hewa na ewnîyayo cor
Mi dî ke binê asmênê keweyî de
Tayê boranî hewa ra kelbut kenî
Ge firenî, ge zî nişenî têlê dîregan ra
Tayê zî war de recifîyenî
Kewtî sekerate, gankêş ê
Ez qayîl bîyo ardim bikero
Mi war ra hewa nayî
La çi fayde!
Yew bi milê ci ro, qerifna,
Sereyê ci zî lişt!
Destê mi de gan da.

V
Sipî ame çimanê mi ser
Xemî na leşe de cirîyenî
Lingê mi gêrayîş ra tewran bîyî
Ziwan bîyo tat, girê dîyayî vateyî
Mi rê xerîb mendo no luxat
Qirrika mi bîya xizik
Leşa mi bîya aresî
Erd ra hewa nênîyena
Pêşîyaya piro welika serdine
Zerrîya mi de kile û şewat
De hey vaje!
Bîyê çend hêvî,
Çend pawitişî,
Û çend wuslat!

VI
To xeyalê mi poynayî, mirênayî
Mi sareyê xo kerd lepê destanî xo
Mi verê xo tada na rêça fîraze
Her çîyê to, mi anto na zerrîya tenike
Mi verê na zerrî zî eşta teber
Mi lej kerd qelema xo de
Hêrsî bîyî vateyî, mi ra kewtî dûrî
Hesirî ha rişenî çimanê mi ra
Mi arê dayî, yew-yew kerdî pistanê xo
Ez kîşta yew nêweşxaneyî ra vîyareno
Mi xo rê va,
Ez şîyero zere
La mi qam nêkerd
Gamêk zî nêeşkayo bierzo
Kîşta min a çepe zî ha dejena...

VII
Bê to hewnî remaye yê
Şewe bîya bêwijdan, bêhes
Tim yew waştişo bêpeynî...
No beden xayis kewto, felc bîyo
Kurinceyî na leşe ra, hezazî
Na zerrî menda bênefes
Yew kuc de kalêk bîyo kung
Kuçe de yew ciwan ha mireno
Ne yew pers ne zî çu kes
Tîya de her çî xaxûd,
Her çî kewto têzere
Ez bîyo sey yew xavrîgî
Dîyayo kinar
Ha xejilîyeno yew xaznag
Rî bi sey şema,
Rî bi çîlzerd
Pişe de cîf merd...

ÎRFAN SÎMSERKÎSIJ
Mîyaran, 26.12.2020