ပုဂံခေတ်က အဇာတသတ် နရသူမင်း(ခ)ကုလားကျမင်း

မြန်မာ့သမိုင်းမှာ အရက်စက်ဆုံး ဘုရင်ရယ်လို့ နာမည်ကြီးတဲ့ နရသူဟာ ထီးနန်းရယူလိုတဲ့အတွက် ခမည်းတော် အလောင်းစည်သူမင်းကြီးအား ရွှေဂူကြီးဘုရားအတွင်း ခေါင်းအုံးဖြင့်ဖိသတ်ခဲ့ပါတယ်။
အလောင်းစည်သူမင်းနတ်ရွာစံသောအခါ နောင်တော် မင်းရှင်စောသည် မင်းပြုရန်အတွက် ပုဂံပြည်သို့လာခဲ့ပါတယ်။ ထိုအခါ နရသူက ပံ့သကူမထေရ်မြတ်ကို အရှင်ဘုရား နောင်တော်မင်းရှင်စောသည် ခမည်းတော်မရှိသောအကြောင်းကို ကြားတော်မူတဲ့အတွက် ရေအား၊ကြည်အား၊ ဖြင့်ချီလာတော်မူလေပြီ ကြာသော်ပြည်ထဲအရေး ဖြစ်လေပြီ၊
ကျွန်တော်မျိုးရှိသောကြောင့်ဓားတစ်စင်း၊မြင်းတစ်စီးဖြင့်သာ
ကြွတော်မူ၍ကျွန်တော်မျိုးကိုယ်တိုင်နောင်တော် ရောက်လျှင် နောင်တော့်ဓားကိုထမ်းပြီး နန်းတင်ပါမည်''ဟု
သစ္စာကြီးစွာပြုခဲ့ပါတယ်။ ပံ့သကူမထေရ်မြတ်သည်''ငါ ခေါ်၍
ရောက်သောအခါ မင်းမမြှောက်လျှင် ငါ အပြစ်ဖြစ်အံ့ ထို့ကြောင့် သင့်ကို ငါမယုံ'' ဟု မိန့်တော်မူခဲ့သော်လည်း နရသူ၏ သစ္စာ စကားကို ယုံပြီး မင်းရှင်စောကို ဖျောင်းဖြခဲ့ပါတယ်။ မင်းရှင်စောလည်း မထေရ်မြတ်စကားကို ယုံပြီး ပံသကူမထေရ်မြတ်နှင့်အတူ နန်းတော်သို့လိုက်လာခဲ့ပါတယ်။ လက်ပံဆိပ်သို့ရောက်သောအခါ နရသူလည်း သစ္စာပြုသည့်အတိုင်း လှေသို့ဆင်း၍ နောင်တော်ဓားကိုထမ်းပြီး နန်းတင်ခဲ့ပါတယ်။
ဘိသိက်သွန်းပြီး ညစာစားပွဲတွင် ဆေးခတ်သောကြောင့် မင်းရှင်စော အနိစ္စ ရောက်ခဲ့ရပါတယ်။ မင်းရှင်စော အနိစ္စရောက်သွားတဲ့အတွက် နရသူ နန်းတက်ခဲ့ပါတယ်။နရသူ ဆေးခတ်၍ အနိစ္စ ရောက်ကြောင်း ပံသကူမထေရ်မြတ် ကြားလျှင် နန်းတော်သို့သွား၍ မင်းဆိုး၊မင်းညစ်၊ နင်ကား သံသရာ၀ယ် ခံရအံ့သောမကောင်းမူကိုမကြောက်၊
ဤစည်းစိမ်ကိုရလျှင် နင်၏ခန္ဓာကိုယ်သည်မအို၊မသေပြီဟူ၍
မှတ်သည်လော၊လောကတွင်နင့်ထက်ပျက်သော မင်းမည်သည်ကား မရှိ ဟူ၍ မိန့်တော်မူပြီးသိန်းခိုကျွန်းသို့ကြွချီသွားခဲ့ပါတယ်။

နရသူဟာ ရက်စက်ကြမ်းကြုတ်သောမင်းဖြစ်သောကြောင့် မှူးမတ်အပေါင်းတို့လည်း သူ့ကိုကြောက်ရွံ့ကြပါတယ်။ သူဟာ သန်စွမ်းသော ရဟန်းပျိုတို့ကို လူထွက်စေပြီး စစ်ထဲ၀င်ခိုင်းခဲ့ပါတယ်။ အချို့သော ရဟန်းတို့ဟာကြောက်ရွံသဖြင့် သိန်းခိုကျွန်းသို့ ထွက်ပြေးခဲ့ကြရပါတယ်။ နရသူဟာ မင်းဖြစ်သွားပြီး နောက် ပြည်သူလူထုအပေါ်တွင် ရက်စက် ကြမ်းကြုတ် စွာအုပ်ချုပ်ရင်း ကောင်းမူတော်ဖြစ်သော ဓမ္မရံကြီးကို တည်ခဲ့ပါတယ်။
သူတည်သော ဘုရားဟာ ပုဂံတွင် ထုထည်အကြီးမားဆုံး ဖြစ်စေချင်သော ဆန္ဒဖြင့် နရသူကိုယ်တိုင် ကြပ်မတ်စစ်ဆေးပြီး လူပေါင်းများစွာ၊ပန်းရံဆရာပေါင်း များစွာကိုစတေးပြီးတော့
ဓမ္မရံကြီးဘုရားကိုတည်ခဲ့ပါတယ်။ နရသူမင်းသည် အုတ်တချပ်နှင့်တချပ်ကြားအပ်နှင့်ထိုးကြည့်၍
အပ်တစ်ချောင်း အုတ်ထဲ၀င်လျှင် ထိုနေရာ တာ၀န်ယူသော ပန်းရံဆရာကို သတ်ပစ်ခဲ့ပါတယ်။ ပန်းရံဆရာတို့ဟာ အုတ်ညီမညီ ၊ အုတ်ကျက်မကျက်၊ အုတ်ကောင်းမကောင်း အုတ်ကို အထူးအလေးထား ရွေးချယ်ရသဖြင့် လုပ်ငန်းခွင်ကြန့်ကြာမှုရှိလာပြီး (၃) နှစ်ကြာသော်လည်း ဘုရားကြီးမပြီးနိုင်ပဲရှိနေခဲ့ပါတယ်။

နရသူဟာ ဖခင်အလောင်းစည်မင်းအား ဆက်သတဲ့ ပဋိက္ခရားမင်းသမီးကိုလည်း သိမ်းပိုက်ခဲ့ပါတယ်။ နရသူသည် အခင်းကြီးသွားပြီး သန့်သက်ရေ မသုံးသဖြင့် ရွံရှာပြီး မင်းသမီးက မခစားသည့်အတွက် ကွက်မျက်ခဲ့ပါတယ်။
ထိုအကြောင်းကိုခမည်းတော် ကုလားမင်းကြီး ကြားသောအခါ ကုလားသူရဲကောင်း ရှစ်ယောက် ကို ''ငါ့သမီးတော်ကို သတ်သောမင်း ရှိရာ ပုဏ္ဏားအယောင်အဆောင်၍ သွားပြီး
နင်တို့သတ်ချေဟု စေလွှတ်ခဲ့ပါတယ်။ ကုလားပြည်မှ ဟူးရားဆရာ ရှစ်ယောက်လည်းရောက်လာပြီးတော့ မင်းကြီးအား ဘိသိက်မြှောက်ပေးမည် ဟုဆိုကာ သန်လျက်(ဓားမြှောင်)များနှင့် ထိုးသတ်သောကြောင့် နတ်ရွာစံခဲ့ပါတယ်။ ထို့ကြောင့် သမိုင်းတွင် ကုလားကျမင်း ဟူ၍လည်း ခေါ်တွင်ခဲ့ပါတယ်။

ဓမ္မရံကြီးဘုရားမပြီးသေးခင်ပင် နရသူနတ်ရွာစံခဲ့သဖြင့် ဆောက်လုပ်ဆဲဘုရားကြီးကို လည်း တန်းလန်းထားပစ်ခဲ့ပြီး ဘွဲ့တော်မမှည့်ရသေးဟု ဆိုကြပါတယ်။ ကုလားတို့လုပ်ကြံသဖြင့် ဓါးမရံမိ၍သေသည်ကိုအစွဲပြု၍ ဓါးမရံမိသည်ကို နှောင်းလူတို့က ဓမ္မရံ ဟူ၍သော်လည်းကောင်း ဓမ္မရံသီ ဆိုသော ပါဋ္ဌိစကားမှဆင်းသက်လာသည်ဟူ၍လည်းကောင်း ဘုရား၏ အနောက်ဘက်အနီးတွင် ဓမ္မရံသီအရှင်သူမြတ်သီတင်းသုံးနေထိုင်သည်ကို အစွဲပြု၍လည်းကောင်း နှောင်းလူတို့လက်ထက်၌ ဓမ္မရံကြီးဘုရားဟုအမည်တွင်ခဲ့ပါတယ်။

ဓမ္မရံကြီးဘုရားတွင် ထူးထူးခြားခြား တခုကတော့ ဘုရားအတွင်းတွင်လှိုင်ပတ်လမ်းနှစ်လမ်းရှိသော်လည်း အတွင်းလှိုင်ပတ်လမ်းကို အဘယ်ကြောင့်ပိတ်ခဲ့တယ်ဆိုတာကိုတော့ ယနေ့အချိန်ထိ မည်သူမျှ မသိနိုင်ဘဲ ရှိနေပါတော့တယ်။

❤️The Burma Library Channel❤️

Thanks for watching my channel. Credit all photos and video to Original creators.No copyright for background music.

All videos from this channel are owned by me & has knowledge purposes for all. My channel does not have any purposes to violate the guidelines of google & youtube policy.I solely follow all the terms of Google & Youtube Channel.