Lut gaya Asr ko jab bagh e shahanshah e Arab Marsiya |Abu Talib Rehmathi&Ashkar Abbas| Machilipatnam

● Marsiya : ( Lut Gaya Asr ko jab bagh e shahanshah Arab )


● Reciter: Abu Talib Rehmathi & Ashkar Abbas

● Poat : Mujeeb Alipuri

● At : Bargah e Hyder E Karar (a.s) Machilipatnam

● Vedio Cover : GROH E MIRANSHAH SAHEB


● Marsiya Lyrics: 👇


Lut gaya asr ko jab baagh-e-Shahinshah-e-Arab

Ek pa ek dashte bayabaa(n) me hua shore ajab
Aag khaimo me lagaye hain adoo haye ghazab

Di sada Baanu-e-Muztar ne ke dauro Zainab

Ghash me hai Aabid-e-beemar jagao Bibi
Jalti hai masnad-e-Sajjad bujhao Bibi


Pyas itni hai ke bistar bhi uthana mushkil
Hai maraz aisa ke karwat bhi badalna mushkil
Dhoop ithni hai ke sehra me teher na mushkil
Zoaf aisa hai ke do gaam bhi chalna mushkil

Sainkdon zakhm liye Aabid-e-dilgeer chala
Haye kis haal me pehene hue zanjeer chala


Al gharaz baap ke laashe pe jo aye Aabid
The khade dayr talak sar ko jhukaye Aabid
Hoke be chain ye Zainab ne kaha ay Aabid
Gham se dam tera kahin toot na jaye Aabid

Marhala sakht hai ab khud ko sambhalo beta
Baap ke laashe se nazron ko hata lo beta


Maqsade haq ke liye ab tujhe jeena hoga
Mushkilon se tujhe har lamha guzarna hoga
Daagh phupion ki aseeri ka uthana hoga
Ujde kumbe ko liye ab tujhe chalna hoga

Har qadam par tere hamrah chalungi pyaare
Saya ban kar mai tere saath chalungi pyaare


Ye suqan sunke bhatije ne phupi ko dekha
Ro ke farmaya phupi jaa(n) ye ghazab hai kaisa
Ran me be goro kafan baap ka laasha hai padha
Shiddathe dard se phat’ta hai kaleja mera

Aasmano se bhi ye baar-e-musibath na uthe
Beta maujud rahe baap ki mayyath na uthe


Phir tane Shah ki taraf dekh ke bole baba
Ye pisar kaise bandhe haathon ko khole baba
Dhoop barsane lagi aag ke gole baba
Hain mere paon me garmi ke phapole baba

Pa ba zanjeer hun kaise tumhe dafnaon mai
Kaash ajaye abhi maut toh marjaon mai


Taaziyane liye ithne me sitam gar aaye
Durre beemar pa be jurm-o-khata barsaye
Nangi oonton pa Nabizaadiyon ko bithlaye
Khauf o dehshat se aseerane bala tharraye

Ithni tezi se adu oonton ko dauraate the
Bachhe girte the jigar maaon ke phat jaate the


Aise aalam me Sakina ne pukara bhaiya
Pushte naaqa pe chhila jata hai seena bhaiya
Dard-o-gham se mera phat’ta hai kaleja bhaiya
Saans lena bhi toh dushwar hai mera bhaiya

Is musibath se mujhe jald churalo bhaiya
Mar rahi hai ye behen aake bachalo bhaiya

Sunke aawaz-e-Sakina ko jo pahunche Sajjad
Boli bhaiya mujhe baba ki bahut aai hai yaad
Abhi sunne hi na paaye the behen ki faryad
Durre lehrate hue aagaye shaami jallad

Pusht par aisa kisi shaqs ne koda mara
Dil se ek aah uthi khaak pe beemar gira


Daud kar goad me Aabid ko liya Zainab ne
Dashte shafqath sare aqdas pe rakha Zainab ne
Rayth ko zaqmon se phir saaf kiya Zainab ne
Choom kar baazu e Sajjad kaha Zainab ne

Uth mere laal phupi jaan ho qurba(n) tujh par
Imtehan aur bhi baaqi hain meri jaan tujh par


Ab tujhe sainkdon taklifen uthani hogi
Sar khule bibiyan aage tere chalti hongi
In nazaron se teri aankhen bhi chhalni hongi
Sakhtiyan raahe safar ki tujhe sehni hongi

Din me aaram na raaton ko bhi sona hoga
Dhoop ka odna mitti ka bichona hoga


Aag barsayenge zaalim tere sar par jani
Ashqiya phekenge tujh par abhi patthar jaani
Bibiyan sham me jayenge khule sar jaani
Tujhko rehna hai abhi qaid ke andar jani

Khaatema tujh pa hare ek zulm ka hoga beta
Tu hai sabir ka pisar sabr dikhana hoga


Aakherash aye Madine me Shahinshahe anaam
Ay Mujeeb ham ne kiya Shah se ek din ye kalam
Sadma kab sabse zyada tumhe pahuncha hai Imam
Roke farmate the Sajjad ke al-Shaam al-Shaam

Saaneha Sham ke baazar ka bhoolun kaise
Waaqiya qasre sitamgar ka sunaon kaise.