ايهما افضل الشاهين ولا سكودا فليشيا | مقارنه شامله " تحسم الجدل " بين الاكثر شعبيه في مصر 🔥 .

ايهما افضل سكودا فليشيا ولا الشاهين
لو رجعنا بالزمن للتسعينات وبداية الألفينات، هنلاقي الشاهين والفليشيا من أكتر العربيات اللي كانت منتشره في الشارع المصري. و كل واحدة منهم ليها جمهورها و سمعتها، بس كلهم بيتجمعوا في نقطة واحدة: عربية شعبية، وسعرها معقول. و لما تيجي تختار م بينهم دلوقت هتحتار ، مين الأجمد؟ مين الأوفر؟ ومين تستاهل فلوسك؟ ايهما افضل ؟ الشاهين ولا سكودا فليشيا

من ناحيه التصميم الشاهين كانت بتيجي تصميم كلاسيكي قديم، بخطوط حادة وزوايا مربعة، تحس إنك راجع للتمانينات حتى لو الموديل 2005
و الفليشيا تصميمها من رأيي عصري اكتر سواء في الجزئ الامامي بالشبك العريض و الكشافات او من الجنبين لكن في كل الاحوال دي ازواق وعلي حسب انت مقتنع ب اي اكتر من ناحيه التصميم

المواصفات الشاهبن بتنزل بموتور 1400 أو 1600 كاربيراتي بقوة من 60 لـ 75 حصان دا مع فتيس مانيوال 5 سرعات. وبالنسبه للابعاد فبتيجي بطول 4.23 م، العرض 1.65 م، الارتفاع 1.41
اما الفليشيا الموتور الشائع ليها مصر: 1300 كاربيراتير بقوة 54 – 75 هورس باور علي حسب النسخه مع فتيس مانيوال 5 سرعات وبالنسبه للأبعاد: الطول 3.87 م، العرض 1.63 م، الارتفاع 1.42

الفئات
الشاهين نزلت بفئتين أساسيتين 1400 و1600، و الفارق في الأداء والسحب.
اما الفليشيا فئات منها سيدان و الاكثر انتشارا كانت الهاتشباك، وبتختلف التجهيزات حسب بلد الاستيراد

التجهيزات
• الشاهين: بتيجي ب أزاز مانويل و مفيش تكييف أو باور في أغلب الفئات، من الاخر كدا عربية “ناشفة”.
• الفليشيا: فيها نسخ فيها تكييف، باور، ازاز كهربا، وسنتر لوك .

وسائل الأمان وسائل الامان للاتنين كانت شبه معدومه بأستثناء متانه الصاج
فالشاهين بكل فئاتها كانت من غير وسائل أمان فعلية. اما الفليشيا: بعض النسخ فيها إيرباج وطبعا الاغلب لا
الاقتصاديه
الشاهين: بتستهلك تقريبًا 10–12 لترلكل 100 ك داخل المدينة، ومعظم نسخها كاربيراتير، فالاستهلاك بيعتمد على حالتها و طبيعه السواقه او لو فيها اعطال او غيره
دا غير انها مميزه جدًا في تكلفة الصيانة، وقطع غيارها متوفرة ورخيصة
و الفليشيا: أغلب الموديلات المنتشرة في مصر بموتور 1300 كاربيراتير، بتستهلك حوالي 9–11 لتر لكل 100 كم.
و الاستهلاك أقل شوية من الشاهين، لكن تكلفة الصيانة أعلى وقطع الغيار أغلى وأقل توفر

يعني الشاهين أوفر في الصيانة، والفليشيا أوفر شوية في البنزين، لكن في مل الاحوال الفرق مش كبير.

الاعتمادية
الشاهين: عربية بسيطة، أي ميكانيكي يشتغل فيها، بس بتحتاج متابعة مستمرة.
اما الفليشيا: أعطالها أقل لو حالتها كويسة، لكن حساسة للكهرباء والتبريد عشان مع الوقت هتلاقي عيب في سخونه العربيه و الحل انك تتابع دوره التبريد
الحجم
• الشاهين: أكبر في الطول، وشنطتها أوسع، أنسب لعيلة صغيرة.
• الفليشيا: أصغر في الحجم، خاصة في المساحه الداخليه ودا بسبب ان العربيه هاتشباك ومساحه الشنطه الخلفيه بتأثر علي المساحه الداخليه

الصيانة
بالنسبه للشاهين : أي ميكانيكي يشتغل فيها، ودا لانهم عارفين كويس اجزائها الميكانيكيه
الفليشيا: محتاجة حد فاهم فيها، وصيانتها أعقد شوية ولو اتعمل فيها صيانه غلط هتجيب اعطال تانيه

قطع الغيار
الشاهين: قطعها موجودة في كل حتة ورخيصة. بالاضافه لانها بتقبل قطع غيار بديله من باقي عربيات فيات
الفليشيا: قطعها أغلى وأقل في التوفر، خاصة بعض القطع الخاصة بالموتور والكهرباء.

نتكلم بقي عن مميزات و عيوب كل واحده فبالنسبه لمميزات للشاهين
• فهتلاقيها رخيصة في الشراء والصيانة
• منتشرة جدًا
• سهلة في الشغل
• قطع غيار متوفرة

اما الفليشيا:
• شكلها أفضل
• مع تجربه قياده أريح
• تجهيزات أكتر
•و استهلاك بنزين اقل
زي م اختلفت المميزات برده اختلفت العيوب لكل واحده عن التانيه
فالشاهين كانت ب استهلاك عالي
و صوت موتور مزعج
• ثبات ضعيف
• شكل كلاسيكي قديم

و الفليشيا:
مشكلة السخونة منتشرة جدًا، خاصة في الصيف والزحمه دا غير كهرباء حساسة و قطع غيار أغلى و صيانة مش متوفرة في كل مكان
السعر
الاتنين سعرهم متقارب ومقبول جدا لاي حد عايز عربيه بسعر مناسب
إعادة البيع
• الشاهين: سريعة في البيع وسوقها شغال
اما الفليشيا: ناس بتخاف منها بسبب السخونة والكهرباء، عشان كدا ابطئ شويه من الشاهين في اعاده بيعها

خلاصه الفيديو الجدلي دا ايهما افضل الشاهين ولا اسكودا فليشيا
الحقيقه انا شايف ان العربين قريبين جدا في الامكانيات لكن من رأيي خليك في الشاهين ودا لان صيانتها اسهل وقطع غيارها رخيصه ومتوفره بشكل كبير اما الفليشيا هتحتاج لصيانه ادق و عند حد مختص دا غير مشكله السخونه خاصه لو بتواجه زحمه في يومك كتير او مضطر لمسافات طويله في السفر دا كان رأيي في العربيتين ولو عندك اي معلومه ي ريت تضيفها في الكومنتات برابط للمعلومه عشان غيرك يستفاد
متنساش اللايك و السبسكرايب
سلام ي وحش