金石堂，東仙緊旋(81雄中罔講，百年懵懂)

金石堂，東仙緊旋(81雄中罔講，百年懵懂)

較早，高雄火車頭猶算鬧熱，
前驛有遠東百貨公司、建國路補習班、長明電子街，
若阮彼時猶未開竅，這種較乖的高中生，上定去踅的，
就干焦去光統圖書百貨看冊、光南批發買唱片。
較有才調的，才有法度假欲補習，
煞攏走課去坐佇麥當勞、肯德基，
兩个人，一杯飲料，兩支欶(suh)管
牽手攬做伙，偷偷仔約會。
毋過，彼當時，公認上蓋TOP，神級的步數，
就是阮班東仙佇BBS網路頂，招網友出來約會。

東仙高一留級2擺，佮阮仝班的時，已經滿18，
伊的眼中，阮齊是囡仔疕(phí)，
臭彈講「伊是神」，阮攏滾笑講「伊是神經病」。

毋過，佇電腦、佇網路頂交網友的領域，
伊真正是神!

彼時，網路猶無遐時行，電腦猶咧286，8吋「軟碟」片，
彼時，逐家攏足欣羨
阮班東仙已經拍電腦的Game、BBS交朋友，
規暗耍甲反過。

會記得有一工，東仙講伊佇網路頂，
有約一个開講2.3個月的三信網友欲單獨見面，
阮逐家拜託予阮做伙去見世面、開眼界，
看網友相見面是啥物款的光景，
敢有彼種「一見鍾情」粉紅仔色的劇情?

東仙講In約佇斯當時八德、中山路口的金石堂冊店，
阮班的猴群就一人一罐
「輕鬆小品」、「麥香奶茶」當作暗號，
提早部署佇一樓、二樓、三樓佮阮所徛的亭仔跤大門口，
「逐家注意，目睭擘(peh)予金，
東仙講查某囡仔會穿格仔裙!」
後來，穎仔佇三樓古典文學區，
看著一个格仔裙的查某囡仔，
雄狂拚到一樓揣逐家鬥參詳，
阮緊佮穎仔做伙(peh)起去三樓確認穎仔的口供。
偷偷仔共看，雖然穿格仔裙，
毋過，體格佮東仙講的160、49，
天差地，這个干焦155、上無有65 Kilo。
阮招穎仔、慶仔、阿力仔、阿霖仔、老江的做伙討論，
「計畫有變，對方無純、無老實!」
咱就趁東仙In猶未見著面，叫東仙跤底抹油，緊旋要緊，
若失約的藉口，就講我臨時墜腸(tuī-tiông，疝氣)，
東仙送我去病院開刀，
理由愈譀古愈好，看敢會使順紲分手，
按呢「一兼二顧，摸蜊仔兼洗褲」上蓋好。

後來，東仙騎伊的白色Dior到金石堂，
阮逐家叫伊緊旋，
「查某囡仔佇網路頂，攏是白賊先，
東仙，咱這古意的高中生，老實人，
千萬毋通去夆騙騙去!」
東仙毋相信，趕上三樓，看著格仔裙，
講應該毋是，Size差幾偌號，
講伊落樓跤，B.B.Call聯絡一下。
阮共東仙講，兄弟相挺，阮留咧三樓，
共監視，佮想辦法共伊的跤步延(tshiân)咧，
「這陣，我斷後，東仙做你去!」

過了5分鐘，有人起來報，
講東仙載另外一个，
後來才到的查某囡仔離開，阮才放心東仙毋免夆拆食落腹。

隔工，東仙臭彈講伊早就知影毋是。
後來問講去佗位，
東仙講:「oo-tóo-bái相載，去踅新崛江，食暗頓，
佮去(當年)上衝的MTV，賰的無恁的代誌!」

兩个心得，
第一、網友的話，形容的體格，真真假假，較濟攏是假。
第二、就若「小王子」冊裡講的:
「真正重要的，是目睭(tsiu)看袂著的。」
就若彼工，金石堂冊店，東仙緊旋了後，
無共阮講的彼，一定是上精彩的!