Küçə musiqiçiləri...

Bir çox səyahət sevərlər öz səyahətləri zamanı əlavə pul qazanmağa çalışırlar. Bu yollardan biri də, küçə musiqisidir. Bəs bunun üçün öncə nədən başlamaq lazımdır?

İlk olaraq bir musiqi aləti seçmək lazımdır. Musiqi aləti, səs-küylü meydanlarda eşitmək üçün kifayət qədər yüksək səsli olmalıdır.

Musiqi ilə məhdudlaşma

Özünüz üçün bir obraz yaradın. Obrazınız nə qədər parlaq olarsa, bir o qədər insanın diqqətini cəlb edə, daha çox pul qazana bilərsiz. Hətta obrazın cəlbediciliyi sizinlə şəkil,video çəkdirmək istəyənlərin də sayını artıra bilər. Yaxud da əgər həm də bir fotoqrafsınızsa şoudan sonra şəkillərinizi satmaq üçün gözəl fürsət olar. Ümumiyyətlə kreativ yanaşmaq lazımdır.

İfa etmək üçün uyğun yeri harada axtarmaq lazımdır?

Məqsədiniz şəhərin ən görməli yerləri ilə uzaq ətrafı arasında orta bir yer tapmaqdır. Ümumiyyətlə, yaşayış binalarının yaxınlığındakı yerlərdən qaçmaq, insanları qıcıqlandırmamaq daha yaxşıdır - yerli insanların şikayətləri heç də xoş olmayacaqdır.
Çox vaxt yaxşı yerlər şəhər mərkəzində, parklarda, sahillər boyunca və turizm yerlərinin yaxınlığındakı sıx küçələrdə olur. Restoran və barların yanında yerləşmək də yaxşıdır. Unutmayın: Müvəffəqiyyətiniz və qazancınız düzgün yerə və əlbəttə ki, sizin performansınıza bağlıdır.
Bir şəhərə gəlməzdən əvvəl bu barədə bütün əsas məlumatları öyrənin: hansı görməli yerlər var, əsas parkları, insanların ən çox hansı küçələrdə əylənmələrini və hansı ərazilərin daha yaxşı olmasını.
Yer axtardığınız zaman digər küçə musiqiçiləri ilə də görüşəcəksiniz. Onlara hörmət edin və tamaşaçılarını özünüzə tərəf çəkməyin. Ancaq rəqiblərdən də qorxmamalısınız. Bir həmkarınızla danışın, hətta birlikdə oynamağı da təklif edə bilərsiniz. İki naməlum musiqiçinin birlikdə kortəbii ifası izləyicilərin diqqətini cəlb edər və yaxşı bir gəlir gətirər. Bundan sonra isə qazancı yeni həmkarınızla yarıya bölə bilərsiniz.

Yeri nə vaxt tərk etmək lazımdır?

Öncə, həddi aşmaq lazım deyil. Uzunmüddətli ifa hətta səbirli dinləyicini də qəzəbləndirəcək. Ortalama limit 1-3 saata qədərdir. Və o da, mütləq fasilələrlə olmalıdır. Əgər daha çox ifa etmək istəyirsinizsə, başqa bir yer axtarın. Bütün gün bu cür edə bilərsiniz, sadəcə tamaşa yerlərini dəyişdirərək şəhərin ətrafında gəzə bilərsiniz.

Özünü necə inandırmalı?

Əvvəllər küçədə heç ifa etməmisinizsə, musiqi alətinizi götürən kimi sizi vahimə bürüyəcəyinə hazır olun. Ancaq özünə qarşı tənqidi davranmaq və Motsart, Paqanini olmadığınız üçün küçədə ifa etməkdən qorxmaq lazım deyil. Addım atın və ifa edin. Yoldan keçənlərin ilk müsbət reaksiyası qorxunu, həyəcanı azaldacaq və siz rahatlayacaqsınız. Ən başlıcası gördüyünüz işdən zövq almaqdır. İstədiyinizi ifa edin və öz musiqinizlə əylənin.

Tənzimləmələr

Səyahətə getməzdən əvvəl, getdiyiniz ölkədə küçədə ifa etməyin qanuni olub-olmadığını yoxlayın. Fərqli ölkələrdə və şəhərlərdə küçə musiqiçilərinə fərqli münasibət var. Məsələn, Münhendə küçədə ifa etmək üçün əvvəlcə imtahan verməlisiniz və daha sonra əsas meydanda yarım günlük ifa üçün 15 avro ödəməlisiniz. Və ya Avstriyanın İnnsbruku, burada yerli şəhər şurasının müvafiq icazəsi olmadıqda cərimələnə bilərsiniz. Ancaq çox vaxt Avropa ölkələrində bu məsələdə ciddi bir tənzimləmə olmur. Əksinə, hər şey ifa edilən yerdən asılıdır. Məsələn, metro yaxınlığında və ya insanların yaşadığı evlərin yanında ifa etmək tövsiyə edilmir.

Polislər ilə necə davranmalı?

Polis gəlsə, əsas odur ki, qorxmayın. Əgər bir gün əvvəl bir oğurluq etməmisinizsə, həbsxanaya göndərilməyəcəksiniz. Adətən cərimə də yazılmır. Belə hallarda polis sənədlərinizi yoxlayır və əsas sualları verir: "Sən hardansan?", "Burada nə edirsən?", "Evə nə vaxt gedirsən?" və sonra sizdən ifa etdiyiniz yeri tərk etməyinizi istəyə bilər. Vəssalam.

Yerli sakinlər qovursa nə etməli?

Cavab təbii ki, çox aydındır – həmin yeri tərk etmək lazımdır. Üzr istəyin, əşyalarınızı qablaşdırın və mümkün qədər uzaqlaşın.

Təhlükəsizlik

Səyahət zamanı təhlükəsizlik həmişə problemdir və küçə musiqiçiləri daima risk altındadır. Əsas davranış qaydaları: ehtiyatlı olun, qəribə tip insanlardan uzaq olun, açıq vəziyyətdə musiqi alətini saxlamayın və gecə alətlə küçəyə çıxmayın.

Nə qədər qazanmaq olar?

Zəmanətli gəlir - bu küçə musiqiçiləri haqqında deyil. Gəlirin nə qədər olacağını heç vaxt təxmin edə bilməzsiniz. Qazancınız dörd əsas komponentdən asılıdır: konsertin keçirildiyi məkan, tamaşanın özü, tamaşaçı və onun əhval-ruhiyyəsi, həmçinin də, sizin şansınız. Bir gündə 30-40 və ya bəxtiniz üzünüzə gülsə, 80-100 avroya qədər də qazana bilərsiniz.

Yekun nəticə

Küçə musiqiçisi olmaq unudulmaz bir təcrübədir. Bu yalnız pul qazanmaq deyil, yaradıcılıq və azad ruhdur. Küçə konsertlərinin sizi zənginləşdirməyəcəyini başa düşməlisiniz, ancaq uzun müddət səyahət etmisinizsə və maddi durumunuz zəyifləyibsə, mütləq sağ qalmağınıza kömək edəcək. Və bəzən də, ən gözlənilməz şəkildə: pula əlavə olaraq, görüş, axşam üçün bir yığıncaq və ya ömürlük dost da tapa bilərsiniz.