«Morrining seshanba darslari— Mich Elbom» TO'LIQ (audio kitob)

«Morrining seshanba darslari— Mich Elbom»

"Har tun uyquga ketganimda o‘laman. Ertasi kun tongda uyg‘onganimda esa qayta tug‘ilaman" (Mahatma Gandi)
Hayot - insonga bir marotaba beriladigan ne‘mat. Bu ne‘matning qadriga yetish, uni go‘zal va betakror lahzalar bilan to‘ldirish har bir ojiz bandaning burchi hisoblanadi.
Hayot haqidagi falsafiy fikrlar, odamlarning bir-biriga bo‘lgan munosabatlari, baxtli bo‘lish sirlari haqidagi kitoblar oz emasligini barchamiz bilamiz. Shulardan biri Mich Elbomning "Morrining seshanba darslari" asari haqida fikr yuritamiz. Kitob 1997-yilda nashrdan chiqqan bo‘lib, biografik asar hisoblanadi. Asar yozuvchining keksa professori hayotining so‘nggi damlarida o‘quvchisiga bergan hayot darslaridan iborat.
Asarimiz bosh qahramoni Morri hayotda o‘z o‘rnini topgan, o‘ziga berilgan umrni mazmunli yashab o‘tgan oddiy universitet o‘qituvchisi. Morrining fikrlashi boshqalarnikidan tubdan farq qiladi. U hayotidagi har lahzadan zavq olishni, har daqiqadan hikmat izlashni biladi. Odamlar oddiy va ahamiyatsiz deb bilgan narsalarni Morri xuddi hayotda birinchi va oxirgi ko‘rishidek e‘tibor qaratadi, uning ichki sir-asrorlarini bilishga harakat qiladi. Uning odamlardan farq qiladigan yana bir jihatini bedavo bo‘lgan ALS kasalligiga chalinganda ham noumid bo‘lmaganidan bilishimiz mumkin. Morrining o‘rnida boshqa inson bo‘lganda ehtimol u kabi sabr-bardoshli bo‘lolmasdi. Umrining so‘nggi lahzalarini yashayotganini bilsada Morri bundan tushkunlikka tushmadi, aksincha bu jarayondan ham rohat topishga urindi. Oyoq-qo‘li ishlamay, o‘rnidan tura olmay va hattoki, shaxsiy zaruratlarni ham bajara olmaydigan ahvolga yetganda ham u bundan hijolat bo‘lmadi. Aksincha buni o‘z ta‘biricha "bolalikka qaytish" deya nomladi. O‘zining boshqa insonlarga qaramligini yoshlik davridagi hamma unga beminnat mehr beradigan, parvarish qiladigan muhitdadek hos qildi. Uning hayoti go‘zal kechdi. Orqaga qaraganda afsuslanadigan holatlari deyarli bo‘lmadi.
Qahramonimiz faqat o‘zining hayotini emas, balki boshqa insonlarning hayotini o‘zgartirishga intilardi. Bu "ov"ning biz bilgan bir "o‘lja"si Mich edi, ya‘ni universitetdagi talabasi. Morrining so‘nggi kunlari yaqinlashganidan xabar topgan Mich murabbiysining ahvolidan xabar olib turishi bilan birga, uning bebaho darslarida ham ishtirok etadi. Ular hayotning turli chigal mavzularida suhbat quradilar. Va alal-oqibat Mich hayotga o‘zgacha nigoh bilan qarashni o‘rganadi. Turmushidagi barcha yaxshi-yomon holatlarga ijobiy ko‘z bilan boqishni, har lahzadan zavq olishni o‘rganadi.

#Ilmparvar #AudioKitob #AudioMutolaa #MorriningSeshanbaDarslari #MichElbom