جديد الشاعر عبدالكريم القصاب || قصيدة منشور من داخل الليل || بصوت محمد الاميري

........ منشور من داخل الليل .....

وحشه وليل مطفي وصفنة آمحبين ،
ومامش بالعيون آنعاس ،
مامش غير ملح آجفون ،
وآمكابر جرح وآمناطر آووهواس .
يفتر العطش بالروح ،
يفتر الحزن بالعين ،
يفتر الوطن بالراس .
شيغمض جفن رمشه ملح وآتراب ؟
شيغمض جرح ينكر آبجرفه آغراب ؟
محبوسه الشمس والليل دوخة راس .
ديره بلا شمس ،لاكمر ، دوخة راس .
ديره بغير عش للطير ،للانسان ......
دوخة راس .
ديره بلا جرف للورده ،للبستان ....
دوخة راس .
ديرة خوف مترب والذياب اجناس .
ديرة خوف ،
والوجه النظيف آمرايته الظلمه .
محروكه المري وتنكسر من تنجاس .
كصر في الصبر بالروح ،
عشب مرعي الصبر ،ماطال في للروح .
وسفه آمن الصبر ذلت آهواي آجروح ،
بس ماذل جرح حساس ،
جرح دمه عصب وآحساس ،
جرح كلما كبر ينباس ،
ياشمعة عرس ، ياروحي ظليتي ....
مثل كمره حزينه بلا غنه ولا كاس .
بطا مهر الشمس ،ماجفل الحراس .
ها يكحيل ، يمغتر آبطيب الكاع
لانك مااجيت آبساع
بطا وجه الصبح عالناس .
ها يكحيل ، وين انت ؟
بعيد انت .
جريب انت .
دمعة عين طفله ،آمغتر آتجيبك ،
نشغة خيط جرغد ،بيرغ آتجيبك .
غترتك بيرغ الغبشه ،
وآصابيعك مشط للياس .
هايكحيل ،يمعدل ،
لذيذه آسوالفك تنباس .
مثل خد العروس آسوالفك تنباس .
يلمشذر عشك وآنجوم ،
يلمشذر قصايد ،كوم ،
فك باب الصبح وآنده وتر فيروز ،
والمي والبلابل والعشك بالناس .
يلمشذر عشك ،
جيب الصبح للناس .
هاكد شوك بينا لشمعة الغبشه !!!!!!
ترفه آرواحنا ،....
وفوك الشفايف مايعه ،......
وخد الصبح ينباس .
يستاهل صبحنا الجاي بوسة روح ،
يستاهل صبحنا آمن الفجر ينباس .
يمفتاح الشمس ،جيب الضوه للناس
وج فانوس بالغابه ،
فك باب الضوه ، يابه.
مطفي الليل والماله ضوه ينداس .
كل شئ آبلا ضوه ينداس
بالظلمه الشذر ينداس ،
بالظلمه الوجه ينداس ،
بالظلمه الشرف ينداس .