假音講電話

客戶講伊的信用卡到期，有換新卡，變新的期限。我隨敲0800，請服務人員直接幫客戶變更。敲了才想到，這個客戶是離職業務員的人客，愛阮某來替伊注文才會使，無0800攏會因為我毋是業務員，就無愛跟我講，一定愛叫阮牽仔來聽電話。
0800誠歹敲，敲通了愛閣等人來接，牽仔佇浴間仔當咧無閒，我貧惰閣重敲，就請坐佇電話邊飲茶的查某囝，來假怹母仔一下，我徛伊邊仔教伊按怎講就好。
查某囝突然間接到這款任務，看起來有淡薄仔緊張，這是正常人的反應。因為佇咱的生活中，袂去假作另外一個人的身份去跟人講電話，除非咱是詐騙集團，才會規工做這款代誌。
「妳等咧就照按呢講就好，足簡單的。恁母仔是查某仔，爹的是查埔仔，聽聲就知。怹袂問妳是誰，媽咪的資料我攏揤好矣。」「我講電話的聲嘛誠低音呢！」查某囝應該猶有一寡心理壓力，閣歹勢共我這個老爸拒絕，只好講伊的低聲佇電話中聽起來，嘛若像查埔的。
雖然我感覺是誠簡單的代誌，但叫人去做跟詐騙集團仝款的工課，會予人誠為難才對。佳哉這通電話等人來接有等較久，為著無愛予查某囝為難，我雄雄想到，我會使用假音跟怹講啊！「喂，請幫我查這個人客的資料」「爹的，你的假音比我閣較形查某聲」然後，電話就接通矣。聽到我跟0800講第一句話了，查某囝隨走去房間匿起來笑，我嘛差一點仔笑場，喙緊掩咧，喙瀾硬共吞落，氣激咧，繼續用假音跟怹講，差一點得內傷！講煞，我跟查某囝才敢大聲笑出來。若上班氣氛攏遮快樂，莫怪詐騙電話有遮濟人咧敲！