Reportazh/Hekurudha Shqiptare, një gjigand në gramat e fundit të jetës-(25 Korrik 2010)

Lajme Arkiva 2010

Udhëtarët që zgjedhin hekurudhën si rrugë komunikimi po bëhen gjithnjë e më të paktë. Në stacionin e Durrësit shumë pak njerëz përdorin trenin për të udhëtuar.

Arsyet janë të thjeshta dhe për t’i rrëfyer ato vendosëm të bëheshim pjesë e një udhëtimi nga Durrësi në Tiranë dhe nga Durrësi në Elbasan.

Siç shihet dritaret e këtij treni janë të thyera, kabina të rrënuara dhe dyer që nuk arrijnë të mbyllen në nivelin e sigurisë.

Sot ky tren ecën me një shpejtësi me 35 deri në 40 km në orë, por edhe këtë shpejtësi e arrin vetëm në disa segmente.

Kështu në vend të një shërbimi për të shkurtuar distancat udhëtimi me të rezulton të jetë edhe më i ngadaltë se çdo mjet tjetër i transportit publik apo privat.

Bileta kushton nga 50 lekë deri në 300 lekë për linjat nga veriu në jug, por kostoja e ulët nuk është se ka pasur efekt në rritjen e numrit të pasagjerëve, sepse kushtet e këqija predominojnë.

Qytetar: “Ku ka kushte më të këqija se atëherë. As xhama, as sendilje të mira, të vish nga Elbasani këtu tre orë, çfarë të bësh”.

Qytetare: “Aq sa duhet jo. E frekuentojmë se është edhe më lirë edhe na intereson”.

Qytetar: “Këto janë, këto trena kemi”.

Qytetar: “Shumë keq edhe këto fatorinot nuk e bëjnë as punën që duhet, sepse e lenë pa pastruar edhe trenin edhe jemi munduar të gjejmë ndonjë letër ta pastroj vet”.

Gazetarja: “Ju e frekuentoni shpesh këtë linjë”.

Qytetar: “Prej zorit”.

Treni i linjës Durrës-Elbasan ka vetëm katër vagonë tejet të amortizuar, ndaj ngjan si një relikt e vjetër e kohës.

Teksa udhëtojmë konstatojmë se kushtet higjienike brenda tij janë përtej çdo kufiri normal, por kjo nuk është e gjitha.

Krahas trenave kanë degraduar edhe hekurudhat. Mashinisti na shpjegon se shpejtësia maksimale e lëvizjes së trenit shkon deri në 40 km në orë dhe në raste kalimi të saj askush nuk mund të garantojë sigurinë e udhëtimit. Ndalesat e pa ligjshme përgjatë linjave janë një tjetër problem serioz për mashinistët.

Astrit Kola: “Për shkak të linjës kjo është shpejtësia. Njeriu duhet të ndërgjegjësohet vet që aty është e ndaluar me kalu. Vjen fjala e paligjshme dmth ai shkel ligjin. Ne e kemi problem se ato dalin vend e pa vend na shqetësojnë”.

Transporti hekurudhor mbetet pika me e dobët e ekonomisë shqiptare. Ky sektor rezulton me humbje të mëdha financiare, edhe pse në 6 mujorin e parë e parë të këtij viti janë regjistruar 5o milion të ardhura me shumë nga transporti i mallrave.

Sipas Drejtorit të Përgjithshëm të Hekurudhës Shqiptare Zamir Ramadani, të ardhurat që sigurohen janë shumë më të ulëta edhe pse çmimi i biletës është tepër joshës krahasuar me shërbimet e tjera të transportit në vend.

Zamir Ramadani: “Në tërësi hekurudha shqiptare është me humbje në mënyrë absolute. Hekurudha ka diçka më mbrapa për sa i përket performancës, vagonëve të tipeve të saj. Këto janë linja që mban mbikëqyrje por që kanë problemet për sa i takon dmth investimeve që duhet të kenë këto linja”.

Me të tilla probleme ky sektor përballet prej vitesh. Pritet që gjendja të përmirësohet disi me një fond prej 225 milion eurosh të BE-së, i cili ka kryer edhe një studim fizibiliteti, e në rast dështimi të këtij projekti, dhënia me koncesion e hekurudhës mbetet e vetmja shpresë për t’i kthyer shkëlqimin hekurudhës shqiptare.

Aktualisht hekurudha shqiptare ka në inventarin e saj 78 lokomotiva, ku vetëm 20 punojnë.
66 vagonë udhëtarësh dhe 225 vagonë mallrash që lëvizin në një rrjet prej 447 km mjaft prej tyre po shkojnë drejt amortizimit total për shkak të vjetërsisë.

Nevojë për ndërhyrje të menjëhershëm ka edhe në shina, traversa sinjalistike, e stacione. Në këtë gjendje ky rrjet hekurudhor përmes të cilit transportohen 1.5 milion udhëtar dhe rreth 500 ton mallra në vit i ngjan një gjigandi në gramat e fundit të jetës./tvklan.al

Gazetare: Enkelejda Arapi

SUBSCRIBE to “RTV KLAN” on YouTube for more videos!

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook:   / tvklan  
Follow rtvklan on Instagram:   / rtvklan  
Programet e Tv Klan mund t’i ndiqni edhe në faqen https://tvklan.al/programe/