قصيدة | بيرق الدمحان - للشاعر راكان بن شراز - حصري 2020

القصيدة | نص 👇🏻.


الهجوس اللي تسابق مثل ترثة كروش
وجهت صوب القريحة من فجوج الخيال

حولت محوال ذودً لها مده عطوش
شافت الماء عقب ماهي حيام إلها ليال

احدرت من نجد للربع مع هاك الدشوش
مع ديار ان تهت فيها رجوعك مستحال

راح راعيها يباري معدات العفووش
و روحت يبرا لها السقس مع دربٍ لحال

و غط عنها راعي السقس في هاك الخشوش
يوم قام اليا جررها توطتها الرمال

و انعطف مع عرق و انه على جره لبوش
قال هذي جرة البوش مافيها جدال

يوم اخذ ربع المسافة دخل قلبه خروش
و اكد انه ضيع الدرب ماتبغى سؤال

لين طَبَح عند بدوً يحالون الوحووش
عن حدود عمان عشرين كيلو للشمال

و انعتوه انعات تستدركه حتى الخدوش
قالوا أنفذ و اترك الذود جعله للزوال

و درهمت تطرد سراباً تقول انه يغوش
عقب تاه اللي منول عليه الاتكال

و ساقها الله صوب عِدٍ توارده الطروش
ومن ضماها تنتق الدلو من روس الحبال

و حافها عودن يعرف الوسايم و النقوش
قال هذا الذود لفلان اخبره يوم احاال

ويضحانً وحدتهن تساوي لك عروش
من ملكهن ما يغبط الوليد ابن طلال

لجل عين اللي على المرجلة كنه يهوش
عندها كنه يداحم شغاميم العيال

بيرق الدمحان متلف ملايين القروش
لا نصحته قال: جعله ما يبقى لو ريال

اغتنى من بطش يمناه جلاب الكبوش
شايباً سبعة بناته ولا عنده عيال

و من صدوف الوقت و الفقر ناش الموت نوش
و ارسل الله من يبدل له أحواله بـ حال

كان ساكن وسط بيتً تقول انه عشوش
و صار في قصرٍ لأهل ديرته مضرب مثال

كل ما حمل و صلى مع الليل الدغوش
قال الا يالله عساها لـ هاك ابن الحلال

و كل ما حول مع السيل فالفجر الغبوش
و مر مكه ثم وجه على جده عدال

و جاء بسوقٍ فيه قوم الدبش مثل الجيوش
مير ما هموه و ان جوه سوامين قال :

سلعتي والله منتم باهلها يالطروش
ابك هذي دون الألفين مافيها مجال

اتحرا اللي فعوله تشيب بالرموش
العديم اللي يدوس الدراهم بالنعال

ابلجن له كف تندا و له وجهً بشوش
يشتري و يقول :الاموال ماهي راس مال

فالكرم و الجود من كثر ما كفه بطوش
تشتكي منه الرعايا على اصحاب الحلال

و يشكي البن اليماني على هيل الحبوش
و تشتكي منه المعاميل عند ابو بلاال

فدوته من لا لفى الضيف قام يدور بوش
واحدن و الله لو انه يذكونه حلال