ឯកឧត្តម អ៊ុក សាវុធ |

ជំនួបពិភាក្សាការងារលើលទ្ធផលនៃការសង្កេតការណ៍សវនាការ រវាងមហាអយ្យការអមសាលាឧទ្ធរណ៍ភ្នំពេញ និងក្រុមការងាររបស់ មជ្ឈមណ្ឌលសិទ្ធិមនុស្សកម្ពុជា(ម.ស.ម.ក) នៅរសៀលថ្ងៃអង្គារ ៧ កើត ខែកត្តិក ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៨ ខែតុលា ឆ្នាំ២០២៥ ។
_____🌿🌿🌿____

មហាអយ្យការអមសាលាឧទ្ធរណ៍ភ្នំពេញ បានជំនួបពិភាក្សាការងារជាមួយក្រុមការងាររបស់មជ្ឈមណ្ឌលសិទ្ធិមនុស្សកម្ពុជា(ម.ស.ម.ក) ដើម្បីធ្វើបច្ចុប្បន្នភាពអំពីលទ្ធផលនៃការសង្កេតការណ៍សវនាការនៅសាលាឧទ្ធរណ៍ភ្នំពេញរបស់មជ្ឈមណ្ឌលសិទ្ធិមនុស្សកម្ពុជា ដែលបានរកឃើញក្នុងរយៈពេលប្រាំពីរខែកន្លងមក គឺចាប់ពីថ្ងៃទី០១ ខែមករា ដល់ថ្ងៃទី៣១ ខែកក្កដា ឆ្នាំ២០២៥។
ជាលទ្ធផលនៃការពិភាក្សានេះ ឯកឧត្តមក៏សូមកោតសរសើរចំពោះលោក សេង សុវឌ្ឍនា នាយកប្រតិបត្តិមជ្ឈមណ្ឌលសិទ្ធិមនុស្សកម្ពុជា និងក្រុមការងារនៃមជ្ឈមណ្ឌលសិទ្ធិមនុស្សកម្ពុជាទាំងអស់ ដែលបានផ្តល់នូវធាតុចូលសំខាន់ៗមួយចំនួនពីលទ្ធផលនៃការសង្កេតការណ៍សវនាការនៅសាលាឧទ្ធរណ៍ភ្នំពេញ ដូចបានភ្ជាប់មកជាមួយនូវឯកសារដែលមានរហូតដល់១៧ចំណុច…។
ក្នុងនោះ ឯកឧត្តមក៏សូមថ្លែងអំណរគុណចំពោះការលើកឡើងរបស់ក្រុមការងារ នៃមជ្ឈមណ្ឌលសិទ្ធិមនុស្សកម្ពុជា ពីលទ្ធផលគួរឱ្យកត់សម្គាល់ និងមានភាពល្អប្រសើរក្នុងការផ្តល់កិច្ចសហការយ៉ាងកក់ក្តៅដល់ដំណើរការអនុវត្តគម្រោងរបស់ ម.ស.ម.ក តាំងពីចាប់ដំណើរការអនុវត្តគម្រោងរហូតមកដល់បច្ចុប្បន្ននេះ ដើម្បីលើកកម្ពស់វិស័យយុត្តិធម៌ឱ្យកាន់តែមានប្រសិទ្ធិភាព ដោយបានបញ្ជាក់ថា៖
តាមការសង្កេតការណ៍សវនាការរបស់ (ម.ស.ម.ក) កន្លងមកនេះ ឃើញថា ចៅក្រម ព្រះរាជអាជ្ញា នៃសាលាឧទ្ធរណ៍ភ្នំពេញ និងមហាអយ្យការអមសាលាឧទ្ធរណ៍ភ្នំពេញ បានដំណើរការនីតិវិធីរឿងក្តីក្នុងតុលាការ ប្រកបដោយភាពឆាប់រហ័ស មានតម្លាភាព សុចរិតភាព និងភាពត្រឹមត្រូវ យុត្តិធម៌ ដែលជាផ្នែកមួយយ៉ាងសំខាន់ ក្នុងការគោរពសិទ្ធិ និងការទទួលបានការជំនុំជម្រះដោយយុត្តិធម៌។
ទន្ទឹមនឹងការពិភាក្សានេះ ឯកឧត្តម អ៊ុក សាវុធ អគ្គព្រះរាជអាជ្ញា នៃមហាអយ្យការអមសាលាឧទ្ធរណ៍ភ្នំពេញ បានមានប្រសាសន៍លើកឡើងអំពីតួអង្គពាក់ព័ន្ធសំខាន់ៗ រហូតធ្វើឱ្យយើងទទួលបានជោគជ័យមកដល់ពេលនេះ គឺក្នុងនោះឯកឧត្តមបានលើកឡើងពីសកម្មភាពការងាររបស់ក្រសួងយុត្តិធម៌ ក្នុងការអនុវត្តកម្មវិធីនយោបាយ និងយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា សំដៅពង្រឹងនិងលើកកម្ពស់គុណភាព និងប្រសិទ្ធភាព នៃប្រព័ន្ធយុត្តិធម៌របស់ព្រះរាជាណាចក្រកម្ពុជា
ក្រោមការដឹកនាំរបស់ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ដោយបានការដាក់ចេញនូវយុទ្ធនាការសំខាន់ៗចំនួន ២ រួមមាន ៖
-យុទ្ធនាការទី១ ៖ យុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ និង
-យុទ្ធនាការទី២ ៖ យុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការ
ដោយយុទ្ធនាការទាំង ២ នេះ ត្រូវបានបង្កើតឡើងក្នុងគោលបំណងដើម្បីពង្រឹង និងលើកកម្ពស់សេវាយុត្តិធម៌ នៅតាមសាលាជម្រះក្តី ដោយក្នុងនោះសាលាឧទ្ធរណ៍ភ្នំពេញ បានខិតខំបំពេញតួនាទីភារកិច្ចស្របតាមយុទ្ធនាការទាំងនេះ ដើម្បីកាត់បន្ថយការកកស្ទះសំណុំរឿង និងបានផ្តល់សេវាយុត្តិធម៌ជូនប្រជាជន ប្រកបដោយភាពឆាប់រហ័ស ងាយស្រួល និងភាពត្រឹមត្រូវក្នុងការអនុវត្តច្បាប់ក្នុងចំណាត់ការរឿងក្តី រហូតទទួលបានការសាទរពីសំណាក់ប្រជាពលរដ្ឋនាពេលកន្លងមកផងដែរ ។
បន្ថែមលើសពីនេះ ឯកឧត្តមអគ្គព្រះរាជអាជ្ញា ក៏បានរំលេចឡើងអំពីកិច្ចការអាទិភាពសំខាន់មួយទៀតរបស់រាជរដ្ឋាភិបាល នីតិកាលទី៧ ដែលបានប្រគល់ភារកិច្ចជូនក្រសួងយុត្តិធម៌ ក្រោមការដឹកនាំផ្ទាល់របស់ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានអាជ្ញាធរជាតិ ហៅកាត់ថា អ.ដ.ក. គឺការបង្កើតយន្តការដោះស្រាយវិវាទក្រៅប្រព័ន្ធតុលាការ ដើម្បីជួយសម្រុះសម្រួលដោះស្រាយវិវាទឱ្យបានឆាប់រហ័ស ជាពិសេសវិវាទរបស់ប្រជាពលរដ្ឋនៅមូលដ្ឋាន។ ដោយឯកឧត្តម បានធ្វើការកត់សម្គាល់ឃើញថា មានប្រជាពលរដ្ឋជាច្រើន បានទទួលយកការដោះស្រាយតាមយន្តការមួយនេះ ហើយពេញចិត្តចំពោះការដោះស្រាយវិវាទរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការផងដែរ ។
ចុងបញ្ចប់នៃជំនួបពិភាក្សានេះ ឯកឧត្តមអគ្គព្រះរាជអាជ្ញាសូមថ្លែងអំណរគុណចំពោះ លោក សេង សុវឌ្ឍនា នាយកប្រតិបត្តិ មជ្ឈមណ្ឌលសិទ្ធិមនុស្សកម្ពុជា និងក្រុមការងារនៃមជ្ឈមណ្ឌលសិទ្ធិមនុស្សកម្ពុជាទាំងអស់ ដែលបានយកចិត្តទុកដាក់ប្រកបដោយការទទួលខុសត្រូវខ្ពស់ក្នុងការការពារសិទ្ធិមនុស្សនៅកម្ពុជា និងសូមជូនពរចំពោះក្រុមការងារឱ្យជួបនៅពុទ្ធពរបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។