【阿田良計盡出要求訂立起始租金 防止謀取暴利！ 政府唔好一拖再拖 令市民生活水深火熱】

10年前嘅節目令我感觸良多。由掃街到訓籠屋，都帶俾我好大嘅反思。特別係籠屋嘅租金都要$1,350一個月嘅時候，更加明白市場失衡嘅問題，而政府都係時候要做啲野來保障基層市民。即使今日有劏房租管，最怕係做咗等如冇做。
今日喺會上面，我再次重申
（一）續租上限最盡喺10%，因為通脹同收入中位數每年都升唔夠5%，15%只會令到基層生活水深火熱。
（二）公屋排隊上樓都要5-6年，2+2+2先可以夠時間比租客上樓。

而最重要嘅，就係起始租金！無起始租金嘅話，條例只係形同虛設，就好似去餐廳食飯得配菜，無主菜。
政府不停強調訂立起始租金係有困難，咁有困難就應該去解決唔係拖！單係靠政府補貼去幫助租戶改善生活，最後補貼嘅錢只會去咗業主袋，唔係幫基層。我就唔明，政府一直都有做差餉物業租金估值，係同市場掛鉤，點會無市場數據呢？

我建議起始租金喺按差餉物業估價署嘅租金指數嘅1+N%去做起始租金。當然N可以傾係幾多，但係都好過無。

1. 起始租金以1.3%為例，一個單位市價租值 如果係$20,000，單位內所有劏房租金總和上限係$26,000（$20000 X 1.3%=$26,000）。

2. 一個單位有幾多間劏房，都只可以喺總數收$26,000，如果有空房 按租出嘅面積百份比定租出總和嘅上限 而唔可以將空房嘅租金轉俾其他租戶。

第二，劏房有起始租金之外，床位都要有起始租金。2011年我住床位個幢有電梯嘅一千尺單位，市值租金係$15,000，而床位的每呎租金都差唔多$70。一個月嘅單位收入近80,000（$1350 X 60個床位= $81,000租金）。租床位俾人有5倍嘅暴利，我絕對唔接受！我要求政府要分開處理劏房同床位，兩樣各自有起始租金先可以完完全全咁保障基層。
今日定起始租金係避免之後政府喺一兩年後，用業主已經謀取暴利嘅租金水平去決定起始租金嘅基礎。如果唔係到時嘅租金水平就會愈來愈高，係暴利加暴利！反而，今日起始租金唔單止可以反映市值，壓止今日嘅暴利，仲可以防範於未然。
政府雖然都放口風，表達唔排除之後會訂起始租金，不過要有數據先可以處理，之後又要分析一大輪先決定到起始租金點樣做。明明我依家俾條好橋出來，係跟差餉租值去做起始租金，就應該快快手去處理，唔好再拖！