ماهي نظرية الفيض ؟!

#نظرية ..الفيض !! (1 )
-هي نظرية اسسهه الفيلسوف اليوناني "افلوطين" المولود بسنة 205 ميلادية ، هاي النظرية تكول : انو الموجودات جميعهه فاضت عن الله ..
-شلون يعني ؟
-هاي النظرية تستند على عدة امور :
اولا : ان الله هو عقل محض ..
-عود شنو يعني عقل محض ؟
-يعني انو الله روح خالصة ونقية ، ومابيه اي أثر من آثار المادة ..
اها ..كمل ..
ثانيا : ومادام الله هو عقل محض (روح خالصة ) ، فهذا معناه انو الله هو عقل كامل وتام ومابيه اي نقص ..
-اي ، وشنو يعني ، وإذا جان الله هو عقل كامل وتام ، شراح يصير يعني ؟
-كون الله عقل كامل وتام ، فهذا معناه انو راح تصير شغلتين :
1- الأولى انو الله مايعقل ومايفكر بالأشياء اللي هيه أدنى وأقل منه ، مثل السماء والأرض والإنسان والنبات وغيرهه ، وإنما يعقل ويفكر بذاته فقط ، لانو مايليق بالكامل ان يعقل ويفكر بالناقص ، فلازم يعقل ويفكر باللي هوه في مستواه ، وبما انو ماكو شي بالوجود بمستواه غير ذاته ، اذن فهو مايعقل غير ذاته ..
2- الشغلة الثانية اللي تترتب على كون الله عقلا كاملا وتاما هي : عقل الله وعلمه بشي من الأشياء ، يقتضي وجود هذا الشي بصورة تلقائية ..
-مو واضح !
-شوف : اذا عقل الله او علم بشي معين ، هذا الشي رأسا راح ينوجد ، مثلا اذا عقل او علم الله شجرة معينة ، فرأسا تنوجد الشجرة ، وإذا عقل انسان ، فرأسا راح ينوجد هذا الإنسان ، وهكذا ..
ثالثا : الله واحد لا شريك له ، وبسيط في ذاته من كل الجهات ، يعني مامركب من أجزاء ، وهذا معناه انو الشي اللي يفيض عنه لازم يكون مثله ، يعني واحد وبسيط وغير مركب ، بمعنى انو اول شي فاض عن الله هو شي واحد ، وانو هذا الكون بمافيه من أجزاء متعددة ، ما اجه مباشرة عن الله ..
-جاشنو اول شي فاض عن الله ، وبعدين وراه فاضت وتكونت بقية الأشياء ؟
-هذا الموضوع راح نسولف بيه بالمنشور الجاي اذا الله كاتبلنه عمر ..

#والحمد لله ..

#نظرية ..الفيض !! (2)
#الصادر ..الأول !!
-سولفنة بالمنشور السابق عن نظرية الفيض ، وكلنه : انو الله هو عقل كامل وواحد وبسيط وغير مركب ، ولازم اللي يفيض عنه يكون مثله (واحد وبسيط ) ..
-وشنو هذا الشي الأول اللي فاض عن الله ، يعني شنو اول شي صدر عن الله ، يعني شنو اول مخلوق ، واضح سؤالي ؟
-اي واضح ، يكولون : بما انو الله هو عقل كامل وتام ، وهذا العقل مايعقل غير ذاته (اللي هيه عقل) ، وانو الله (العقل الكامل ) عندما يعقل شي معين ، فراسا راح ينوجد هذا الشي ، بناءا على هذا كله ، فالله (العقل الكامل ) ، عندما عقل وعلم ذاته (اللي هيه همينة عقل ) ، انوجد رأسا عقل آخر غير الله ، وهذا العقل اللي انوجد بعد أن عقله الله وعلمه ، هذا العقل الآخر يسمونه "الصادر الاول" ، يعني اول شي صدر وفاض عن الله ..
-هااا ، هسه عرفت شنو معنى مصطلح الصادر الاول ، تقصد بيه المخلوق الأول مو صحيح ؟
-اي صحيح ، وهذا المخلوق الأول او العقل اللي صدر وفاض عن الله ، هو مثل الله (العقل الاول ) ..
-شنو يعني مثل الله ؟
-يعني هذا العقل اللي صدر وفاض عن الله مثل الله ، همينه مايعقل ومايفكر بالأشياء اللي اقل منه ، وإنما يعقل ويفكر بالأشياء اللي بمستواه والأشياء اللي هيه أعلى منه ، ولذلك هذا العقل الصادر عقل ذاته وكذلك عقل الله (العقل الكامل ) ..
-اي وبعدين شصار ، يعني هذا العقل الثاني من عقل وعلم ذاته ، وعقل وعلم العقل الكامل (الله ) ، شنو اللي صار ؟
-عندما عقل وعلم العقل الصادر ذاته وعقل وعلم العقل الكامل (الله ) ، صدر وفاض عن هذا العقل الثاني عقل ثالث ، وهذا العقل الثالث همينه مايعقل الأشياء اللي اقل منه ، فعقل وعلم ذاته وعقل وعلم العقل اللي قبله ، فصدر وفاض من هذا العقل الثالث عقل رابع ، وهكذا العقل الرابع والخامس ....وصولا الى العقل العاشر ..
-يعني نكدر نكول : انو هذا الفيض مثل السلسلة اللي تبدي من الأعلى إلى الادنى ، واللي تبدي حلقتهه الأولى بالعقل الأول الكامل (الله) ، وبعدين الحلقة الثانية هي العقل الثاني ، وهكذا إلى ان نوصل إلى الحلقة الأخيرة من السلسلة وهي العقل العاشر ، صحيح ؟
-اي صحيح ، وهاي المراتب الموجودة بسلسلة الفيض ، هي مختلفة بالدرجة مو بالطبيعة ..
-مو واضح !!
-يعني هاي الحلقات العشرة من سلسلة الفيض ، طبيعتهه وحدة وهي أنها روحية عقلية ، بس الاختلاف صار بدرجة هاي الروحية او العقلية ، بحيث العقل الاول هو أشد درجات العقل والروحية ، والعقل الثاني هو اقل منه درجة ، والعقل الثالث هو اقل درجة من العقل الثاني ، و هكذا حتى نصل إلى العقل العاشر اللي هوه أدنى مرتبة من بقية العقول العشرة ..
-اها ، هسه واضح ، كمل ..
-هذا الترتيب اللي هوه من الأعلى إلى الأدنى يختص بالترتيب السماوي ، وعدهم ترتيب آخر يسمونه الترتيب الأرضي ، وهو عكس الترتيب السماوي ..
-شلون يعني ؟
-يعني الترتيب الأرضي للموجودات يبدأ من أدنى الموجودات وينتهي بأعلى الموجودات ..
-مو واضح كلش !
-الترتيب الأرضي يبدي من المادة الأولى (الهيولى اللي هيه ماالهه وجود فعلي وإنما هي مجرد استعداد وقابلية لان تصير اي شي ) ، ثم العناصر الاربعة (الماء والهواء والنار والتراب ) ، ثم المعادن ، ثم النبات ، ثم الحيوان ، ثم الإنسان ..
-زين شنو حلقة الوصول بين العالمين ، اقصد العالم او الترتيب السماوي ، وبين العالم او الترتيب الأرضي ، شنو اللي يربط بين هذني العالمين ؟
-اللي يربط بين ذني العالمين هو العقل العاشر ، واللي يسمونه مرات "فلك القمر" او "العقل الفعال" ..
-عود ليش يسمون العقل العاشر ب"العقل الفعال" ؟
-لانو العقل العاشر هو أوجد وابدع المخلوقات المادية والارضية ، فهو فعال لانو يفعل ويوجد المخلوقات الأرضية ..

#والله العالم !!