雄中的游泳課(84雄中罔講，百年懵懂)
Автор: 莊毅冠
Загружено: 2023-10-04
Просмотров: 886
雄中的游泳課((84雄中罔講，百年懵懂)
2023，舊曆過年，
做伙去共高中導師林立志食飯拜年，
老師的孫仔(sun-á)是珍儀的大學姊妹仔伴。
真歡喜，熟似這對仝屆88級的雄中翁仔某，
無講毋著，是一對。
查某囡仔是音樂班的才女，
翁婿是彼時音樂班隔壁的，
開講的時，查某囡仔滾笑講，
翁婿彼時較欣賞的
是另外一个查某囡仔，毋是伊。
毋過，翁婿拍死嘛毋認，
閣緊掰會講，25年前就有注意著太太青春時，
毋過彼時，無藉口嘛毋敢倚近。
後來，有機會行鬥陣，算美夢實現成真。
彼工，有講著彼時佇雄中上游泳課，
毋知啥物緣故，In班是全雄中仝屆唯一
會當佮音樂班做伙上游泳課的班，
聽起來敢若真Romantic，袂輸「浪漫愛情劇」。
毋過，事實是兩班的
查埔囡仔、查某囡仔面攏tuh-tuh，
逐節課一半以上的人攏講身體無爽快，
若無就講mè-sù(月事)來，無欲落水。
阮共問講敢是因為查埔查某穿游泳衫游泳褲，
少年傷閉思，青春傷歹勢?
In講毋是，干焦是因為雄中的游泳池，
有蟲豸(thuā)佮樹葉仔滿滿是，
譀古講若牽羹(kinn)，水無講蓋清氣，
所以高中時仔，游泳學無起來，
到大學特別去學才會曉。
後來，阮太太珍儀共我講，
其實查某囡仔佇學校上游泳課蓋費氣，
In毋但愛替換游泳衫，頭毛落水，
下課欲吹焦，才是大工程。
這嘛予阮想起佇雄中游泳池上課的時，
1997年，阮高二，第一學期，第一節游泳課，
老師問逐家敢會曉游泳，我佮一寡同學共應會。
老師叫逐家落水，一逝25米，來回50米，試看覓，
我刁工欲展一下，
用掠篙泅(lia̍h-ko-siû，自由式)衝出去，
半中途換四跤仔泅(sì-kha-á-siû，蛙式)，
翻頭，用攑頭蛤仔(gia̍h-thâu-kap-a，抬頭蛙)
展一下仔換氣技巧，
上尾，用死囡仔䖙(sí-gín-á-the/thenn，仰式)輕鬆收尾。
叫是老師會共我呵咾，結果老師講我的姿勢，
袂輸欲駐(tū)死的款。
斯當時，看無家己的姿勢。雖然老師按呢講，
毋過，自信家己是捌泅過高屏溪窟仔的少年家，
無咧共信篤(táu)
後來，老師詳細教阮逐家標準動作，
目標:加強捒水，減少水的阻力。
譬論，掠篙泅(lia̍h-ko-siû，自由式)，
手向頭前伸出去的時，手股(tshiú-kóo)愛磕(kha̍p)耳仔，
手落水了，伸直大力掰水，
收倒轉的時，愛𫝻(huê)著大腿。
我照咧做，雖然有較了力，毋過，速度加足緊。
毋但按呢，老師共我講，
換氣的時，毋免出力共頂半身攏thóo出水，
干焦，共頭越(ua̍t)正手後爿45度，
頭佮鼻刀會共水擋咧，免驚會食著水。
這个換氣的動作上輕可，水的阻力上細，
我綴咧做，一學期認真練落來，
速度較緊，動作較細嘛較省力。
上尾一節課，我走去共阮班體育老師黃崑河說感謝，
講當初時，學泅水，
是阮「二哥」𤆬(tshuā)去社區游泳池共阮教，
簡單叫阮手綴咧比，就共阮捒落水，
那食水，那學泅水，
浮浮沉沉，離離落落，
一直到老師一步一步教，才共姿勢撨正，
阮誠心感謝，當年黃崑河老師的游泳課，
感謝彼時，我有落水，真正有學著。
--2023.09.30
Доступные форматы для скачивания:
Скачать видео mp4
-
Информация по загрузке:
