(شوية دردشه) عزبة الدكتور

#عزبة_الدكتور
ف القرن الماضي ولد دكتور بهي الدين الخولي باحدى قرى محافظة كفرالشيخ قرية القصابي.

وتدرج ف مراحل التعليم المختلفه ابتدائي، اعدادي، ثانوي ودخل كلية الطب واتخرج منها واتخصص طبيب عيون.

والدكتور كان بيملك بعض الارضي الزراعيه ٢٠ فدان ف قريته القصابي
وحوالي ١٠٠ فدان ف مكان تاني المكان التاني دا اتسمى بعد كدا
( عزبة الدكتور)
ودا نظرا لانه ابرز الشخصيات الموجوده ف العزبه من حيث املاكه الكبيره اللي كانت فيها .

واهالي القريه كلهم يعرفوا ليه بلدهم اتسمت بالاسم دا
وان كان فيهم ناس مايعرفوش اسم الدكتور ولكن عارفين سبب تسمية القريه بالاسم دا.
وسامحوني لو فيه معلومات متعلقه بالتواريخ مش موجوده بس دا اللي قدرت اوصله.
ف ظل ازمة الوباء العالمي كورونا كل الدول ومن ضمنها مصر بتعمل احتياطتها
ومن ضمن الاحتياطات دي عمل وتخصيص مستشفيات لعزل المرضى المصابين او المشتبه اصابتهم بالمرض .
واللي موجوده ف العديد ف المحافظات المصريه ومن ضمنها مستسفى العزل بالاسماعليه
ومن ضمن الطاقم الطبي للمستشفى كانت الدكتوره (سونيا عبد العظيم عارف)
والدكتوره من قرية (شبرا البهو) مركز اجا محافظة الدقهليه.

ويشاء المولي عز وجل انها تتعدي من احد المرضى ف المستسفى ويتوفاها الله وتغسل ف المستسفى وتاتي مكفنه عشان تندفن ف قريتها (شبرا البهو )
وهنا كانت المفاجئه اهالي القريه العظماء يخرقوا كل وسائل الحمايه اللي نصت عليها الدوله ووزارة الصحه ويتجمعوا كلهم بالشكل دا بين كل واحد والتاني اقل من نص متر طبعا انت متخيل انهم جايين يودعوها ويعملولها جنازه لا دول متجمعين وقطعوا الطريق على عربية الاسعاف عشان يمنعوها تدخل البلد اصلا
والعربيه فضلت واقفه اكتر من ٦ ساعات مع اهانه وشتيمه للسواق . وجثة الدكتورة عليها رحمة الله فيها عشان ماتندفنش ف القريه عشان خايفين على نفسهم من العدوى ودا احتمال مش وارد نهائي
متخيلين كم الغباء والجهل اللي وصلناله
متخيلين وصل بينا الحال ان ماعدش فيه احترام لحرمة الميت لاي درجه.