Дорнод аймаг, Хэрлэн сумын 8-р бага сургууль Шинэлэг WASH төсөл

Дэлхийн Зөн Хонг Конг ОУБ-ын санхүүжилтээр Дорнод аймгийн Хэрлэн сумын 8-р бага сургуульд байгаль орчинд ээлтэй, эрчим хүчний хэмнэлттэй инноваци бүхий Ус Хангамж, Ариун Цэвэр, Эрүүл Ахуйн байгууламжийн төслийг Дэлхийн Зөн Монгол ОУБ болон Дорнод ОНХ хамтран амжилттай хэрэгжүүллээ.
Төслийн зорилго: Орон нутгийн хүүхдүүд, иргэдийг байгаль орчинд ээлтэй, эрчим хүчний хэмнэлттэй ус, ариун цэврийн байгууламжаар хангахын зэрэгцээ сурагчдад эрүүл ахуйн зөв дадал, хэвшлийг төлөвшүүлэхэд оршино.
Төслийн хугацаа: 2024 оны 3-р сараас 2025 оны 2-р сар хүртэл (1 жил)
Санхүүжүүлэгч: Дэлхийн Зөн Хонг Конг ОУБ
Төслийн үр дүн: Нарны цахилгаан үүсгүүртэй гүний худаг: Сургуулийг болон ойр орчмын айл өрхүүдийг цэвэр усаар хангах боломжтой болсон.
Эрчим хүчний хэмнэлттэй ариун цэврийн байгууламж: Сургуулийн ариун цэврийн байгууламжийг шинэчилэхдээ тусгай хэрэгцээт хүүхдүүдийн онцлогийг харгалзан шийдсэн. Энэ байгууламж нь уур амьсгалын өөрчлөлтөд ухаалаг, байгальд ээлтэй "WASH буюу Ус, Ариун Цэвэр, Эрүүл Ахуйн" шийдлүүдийг агуулсан.
Дуслын системтэй хүлэмж: Сурагчид биологийн хичээл дээр тариалалтын дадлага хийхээс гадна үдийн цай хөтөлбөрийн хэрэгжилтэд хувь нэмэр оруулна.
Төслийн ашиг шим хүртэгчид: Сургуулийн хувьд олон хүүхэдтэй, ариун цэврийн өрөөнүүд нь олон жил засвар хийгдээгүй, суултуур, угаалтуурын хүртээмж багатай, хаалга, үүд, цоожгүй, агааржуулалт муу, хөгжлийн бэрхшээлтэй хүүхдүүдэд зориулсан ариун цэврийн өрөө байхгүй зэрэг хүндрэлүүд байсан. Төсөл хэрэгжсэнээр эдгээр бүх асуудал шийдэгдэж, бага сургуулийн 1133 хүүхэд болон 44 багш, ажилчид ахлах сургуулийн 929 сурагч, 41 багш ажилчид энэ төслийн үр шимийг хүртэж байна.