Sherr dhe fyerje në Parlament, përplasja Olldashi-Gjinushi për lëndët narkotike - (8 Qershor 2006)

Lajme arkiva 2006

Fyerje të rënda në sallën e Kuvendit dhe vetëm pak çaste kanë evituar konfrontim mes kryetarit të Partisë Social Demokrate, Skënder Gjinushi dhe Ministrit të Brendshëm, Sokol Olldashi. Shkak është bërë diskutimi në seancë i iniciativës së qeverisë që e detyron kryetarët e komunave e bashkive, të monitorojnë territoret që administrojnë për të parandaluar mbjelljen e bimëve të lëndëve narkotike.

Ministri Olldashi ka sqaruar deputetët për projektligjin e ndryshuar duke e cilësuar si një masë të nevojshme për të parandaluar prodhimet e kanabis sativës në Shqipëri. Ndërsa për opozitën ky projekt ligj krijon kundërshtime me kushtetutën në kartën e autonomisë lokale. Interpretimet e ndryshme kanë sjellë replika në sallë mes ministrit Olldashi dhe kryetarit të Partisë Social Demokrate Skënder Gjinushi.

Sokol Olldashi: “Askush nuk i kërkon kryetarëve të bashkive dhe të komunave marrin frapin në dorë dhe të dalin e të korrini ara me kanabis, por ajo që u kërkohet kryetarëve të komunave nga ky projektligj është që të mos mbyllin sytë kur kalojnë përpara një bime tre metra të lartë së pari. Së dyti për t’iu përgjigjur edhe pyetjes së fundit që bëri zoti Gjinushi. Unë besoj që nuk meritoj t’i përgjigjem 9 pyetjeve të tjera të tij për shkak se kam dyshime se zoti Gjinushi me këtë projektligj ka konflikte interesi, për arsye, se referuar akuzave të dy nënkryetarëve, dy ish-nënkryetarëve të tij zoti Gjinushi është një njeri që është marrë me skafe dhe unë nuk e kam ditur kurrë se çka pasur brenda skafeve të tij.”

Skënder Gjinushi: “Bandit. Për sa kohë do të vini ministra banditë që janë zgjedhur vetëm me votat e bandave.”

Jozefina Topalli: “Rregullorja ju ndalon të flisni në këtë gjuhë.”

Skënder Gjinushi: “Rregulloren shko tregoja satëme, rregulloren. More vesh ti? Prandaj për sa kohë do të vini ministra banditë dhe rrugaçë si zoti Olldashi dhe meqenëse ke burrërinë të fshihesh pas atij kryelegeni që keni kryeministër atëherë hajeni të dy bashkë bëni kallëzim penal dhe mos ja kërko kryetarit të komunës se dike shumë gjëra dhe paske mbyllur sytë vetë dhe mbas këtij ligji përgjigjes penalisht. Në komunë ka vjedhje, në komunë ka vrasje do mbyllë sytë kryetari i komunës? Në komunë mbillet hashash, në komunë ka trafik prostitutash. Në komunë dhe bashki bëhen, ku do bëhen tjetër? Në komuna dhe në bashki. Në qoftë se kryetarët e komunave e të bashkive qenkan përgjegjësit pse është ministria jote. Ti del tepër. Ti i tepërt je. Ti je vetëm një copë rrugaçi dhe vazhdo të qëndrosh aty.”

Sokol Olldashi: “Zoti Gjinushi unë kam vetëm një gjë fare të thjeshtë. Qohu prapë dhe unë të njoh prej shumë vitesh. Qetësohu, e para punës të komplimentoj për gjuhën e pedagogut që përdor tregon që je njeri i kulturuar...”

Jozefina Topalli: “Me atë fjalë që keni përdorur Zoti Gjinushi, unë nesër mbledh byronë dhe do t’ju përjashtoj nga parlamenti. Po. Po, këtë e bëj unë ”

Sokol Olldashi: “Së dyti akuzat i kanë bërë nënkryetarët e tu jo unë.”

“Ndërprite seancën dhe përjashtoje.”

Jozefina Topalli: “Dy minuta pushim, dy minuta pushim.”

Pavarësisht diskutimeve të tejzgjatura kuvendi me 60 vota ka miratuar parimisht projektligjin e ndryshuar.../tvklan.al

Gazetare: Sonila Agostini


SUBSCRIBE to “RTV KLAN” on YouTube for more videos!

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook:   / tvklan  
Follow rtvklan on Instagram:   / rtvklan  
Programet e Tv Klan mund t’i ndiqni edhe në faqen https://tvklan.al/programe/