龜殼頂的愛情，記雄中植物園(88雄中罔講，百年懵懂)
Автор: 莊毅冠
Загружено: 2024-08-12
Просмотров: 527
龜殼頂的愛情，記雄中植物園(88雄中罔講，百年懵懂)
雄中植物園，有各種植物，予逐家熟似生態。
其實這件代誌並無奇怪，雄中的教員自日本時代開始，
就對高雄，甚至對台灣的人類學、生物學等有真深的研究。
雄中植物園有一个水池仔，有飼魚仔佮幾若隻烏龜。
雄中校園自由開放，
我想凡勢是外口的人，掠來放生的。
其實想想咧，真有可能，飼寵物，
狗仔、貓仔、鳥鼠仔、鳥仔，In的生命，比人較短。
毋過，若準飼的是烏龜，In凡勢會當活欲100年較加。
主人攏倒轉去矣，烏龜猶佇人世間沓沓仔行，
想想咧，敢是因為按呢，
蓮池潭等等一寡所在，才會有遮濟大大細細的烏龜。
一斗，佮一對雄中仝屆的翁仔某開講，
In講較早音樂班負責摒掃植物園，
有看見水池仔邊的烏龜，
差不多攏有去夆用「立可白」刻字，
有偷罵教官，偷罵鍾錶馬表的話語；
嘛有講愛情偌爾仔堅定的代誌，
親像「某乜人愛心某乜人」。
翻頭共想，較早讀冊的時，
就定看著雄中的招女朋友佇植物園，
約會坐佇水池仔邊，牽手講細聲話，
我想In共烏龜掠起來寫山盟海誓，嘛拄好爾爾。
雄雄，阮想著彼時當時行的「周星馳電影」
「假使，欲佇這份愛情加上期限，我希望是一萬年。」
雄中生有巧就著，
共愛情，共心意記咧烏龜頂面，
上無嘛有通擋欲五六十年一甲子。
就按呢，一擺倒轉雄中拍籃球進前，
刁工踅過去植物園欲看烏龜頂敢猶閣有字
入去植物園，烏龜仝款佇水池仔邊曝日頭，清閒仔清閒，
我一隻一隻共反過來看，烏龜的身軀已經看無字，
連退色的痕跡都攏看無。
阮咧想，
青春時的愛情攏袂輸千斤重，
磕袂著就落筆欲共人允一世人。
後來，時間流轉，緣分聚合離散，
沓沓仔感情薄縭絲，就敢若烏龜雖然會活100年，
毋過「立可白」的印記，沓沓仔會烌去。
我想，雖然按呢，
毋過當初時的生日願望，當初時的誠懇心意，
佇當初時的龜殼頂，絕對真心，絕對實拄實。
2024.08.12
Доступные форматы для скачивания:
Скачать видео mp4
-
Информация по загрузке:
