إهداء إلى الشيخ : ثواب بن وندان الصميلي / الشاعر : راكان بن بدن - ادا المنشد : حمد الطويل "

اسلم يا ابو نايف ووصّل سلامي ثواب
وان جاوبك قل يقول ابن بدن مايلي :

يا ابو مهدي ويلك من الله نهار الحساب :
كثر ما تنحر يدْك حاشي وتذبح طلي

لكن على اسمك ثواب ( الله يزيدك ثواب )
مثل ما قدرك مع اهل الطايله معتلي

لافتح كشف الحضور وفتح كشف الغياب
عز الله انّك حزام الضايق المبتلي

بعض الدعاء ندري انّه صدق مايستجاب
ياللي سعاطير راسك بالجميل تغلي :

ياليت عمرك يا ابن وندان يبطي شباب
ولا يجيك الهرم والموت بأمر الولي

اصوك ودندون وسنافي وطيّب جناب
كنّك تقول لكبيرات الحمول اقبلي

وصامل ولا فيك قلبٍ للصعايب يهاب
خصوصاً اليا دعاك الموقف المفصلي

مالان قلبك سوى في حب علط الرقاب
وضحٍ يجي عندها للقوم ضرب صملي

غواربٍ سند وظهوراً سواة الهضاب
وعرقوبٍ اهزع وخشمٍ للسماء معتلي

في شفّها ماتحسّب للمسافه حساب
لا قيل حوّل من مزون السحايب ولي

كم طامعٍ لا اعرضت بالوسم هوّن وهاب
عمودها محتميها دون عيد وعلي

حامينها آلاد صامل بالقنا والحراب
العزوه اللي سنا نيرانها تصطلي

الله خلقهم عقوبه قبل يوم العقاب
عدوهم من سطرهم يضرب الجندلي

سبعان سعد الرفيق وللمعادي عذاب
كم ضايقٍ لا زبنهم كربته تنجلي

واسم آل وندان نوماس وفخر وانتساب
اسمٍ سجلاته بـ صدر الزمن ممتلي

يستاهلون الثناء شيبان والا شباب
يا جعل شيبانهم في طيّب المنزلي

وانا علي حلف ما احث القدم والركاب
الا لأبو صيتٍ مشرّف وقدرٍ علي

ولا امدح الا عزيز القدر دمث الجناب
المدح ما يرهم الا للكريم الشلي

واذا دعى اللازم بموقف ماعنْه انسحاب
آقف وقوفٍ يسرّ سبيعيٍ وسهلي

كلمات : راكان بن بدن