“Euronews" kanalında Bakıda keçirilən Böyük Dəbilqə turniri haqqında xüsusi reportaj yayımlanıb

"Euronews" kanalında Bakıda keçirilən Böyük Dəbilqə turniri haqqında xüsusi reportaj yayımlanıb. Reportajda turnirin ilk gününün ən yaddaqalan məqamlarına toxunulub:

Dünya Cüdo Turunun ən nüfuzlu turnirlərindən biri olan Bakı Böyük Dəbilqəsi bu həftəsonu dünya cüdo elitasını bir araya gətirir. "Odlar Yurdu" bir daha planetin ən güclü cüdoçularına meydan oxuyur!

Turnirin ilk günü Yaponiyanın tam üstünlüyü ilə yadda qalıb. Asiya nəhəngi bütün beş çəki dərəcəsində qızıl medal qazanıb. Xüsusilə Tsunoda Natsuminin (-48 kq) çempionluğu, Abe Utanın (-52 kq) uğurlu geri dönüşü və Tamaoki Momonun (-57 kq) qələbəsi günün əsas hadisələri olub.

Milli Gimnastika Arenasında yerli və xarici azarkeşlər tribunaları doldurmuşdu. Yarışın ən gərgin görüşlərindən birində Tsunoda Natsumi qalib gəlib və yarışdan sonra hisslərini bölüşüb:

“Bakıda döyüşmək həqiqətən möhtəşəm idi. Azarkeşlərin enerjisini hiss etdim. Olimpiadadan sonra uzun fasilə vermişdim və bir az paslanmış hiss edirdim, amma ümumilikdə bugünkü çıxışımdan razıyam.”

Azərbaycan cüdoçuları üçün də turnirin startı uğurlu olub! -60 kq çəki dərəcəsində Əhməd Yusifov və -66 kq-da Elşən Əsədov möhtəşəm çıxış edərək bürünc medallar qazanıb. Ev sahibi ölkənin azarkeşləri bu uğurları böyük coşqu ilə qarşılayıb.

Bakı Böyük Dəbilqəsi qızğın mübarizə və sürprizlərlə davam edir. Azərbaycan cüdoçularının qarşıdakı günlərdə daha böyük uğurlara imza atacağına ümid edirik!