Filter Suyu Faydalıdır? Ən Sağlam Su Hansıdır?

#BirBax #su #filter
Salam dəyərli izləyicilərim. Fikir verirsinizsə, son dönəmlərdə su filterləri dəbə düşüb. Hamı istəyir ki, filtrlənmiş su içsin. Görəsən düzmü edirik? Krant suyu, filter suyu, bulaq suyu-bunların hər biri fərqlidir və hər birinin içilməsinin üstünlükləri və mənfilikləri də var. Bu gün sizə bu suaların fərqindən danışacam. Videomuza sona kimi baxanlar hansı suyun faydalı olduğunu biləcəklər. diqqət ekrana.

Krant suyu da evimizə gəlib çatanadək bəzi filtrasiya prosedurlarına məruz qalır, xlorlanır. Beləcə, bizə gəlib çatan krant suyunda, uzağı, bağırsaq çöplərinə rast gəlinir. Təbii ki, bağırsaq çöpü olan suyu içmək düzgün deyil. Lakin suyun mütəmadi olaraq xlorlanmasına etiraz edərkən bu çöplər haqqında düşünməliyik. Xlor məhz onları məhv etmək məqsədilə istifadə edilir.

Bəs, suya vurulan xlor orqanizmə faydalıdır, yoxsa zərərli? Əvvəlcə, bildirməliyəm ki, xlorlu suyun orqanizmə ziyan vurduğu haqqında heç bir məlumat yoxdur. Lakin yüksək miqdardakı xlorun orqanizmi zəhərlədiyini hamı bilir. Hətta xlor qəbulu ilə əlaqədar yaranan bəzi xəstəliklər haqqında da məlumat tapmaq mümkündür.

Burdan çıxan nəticə belədir: krant suyunu içə bilərsiniz, ondakı cüzi miqdardakı xlor orqanizmə ziyan vurmaz. Lakin bir şeyi də unutmayın: binamızın su sistemindəki borular paslı ola bilər. Bunu bilmək üçün sistemə gələn suyu 1 sutka ərzində bağlı saxlayın. Sonra açın. Əgər krantdan paslı su gəlirsə, demək, borular paslıdır. Yəni xlor sayəsində bağırsaq çöplərindən xilas olduq, amma indi də pas içirik. Neyləməliyik? Təcili şəkildə boruları dəyişdirmək barədə düşünməliyik.

Çarəni filterdə axtaran da var. Belə ki, ümumi sistemdə yenilənmə işi aparmaqdansa, bir su filteri alır, suyun evə girən yerinə quraşdırır, vəssalam! Təbii filterləmə prosesinə üz tutanlar da var. Başqa ölkələrdə kömürdən, kokos qabığından istifadə edirlər, bizdə isə əksər evlərdə palstik qaba qoyulmuş pambıq filterlər dəbdədir. Bu filtrləmə mexanizmləri nəticəsində bizə gəlib çatan su sağlam su deyil. Bəli, təəccüblənməkdə haqlısınız, amma belədir. Çünki suyun tərkibindəki minerallar da zərərli maddələrə qarışaraq filterin içində qalır; gəlib orqanizmə çatmır. Halbuki babalarımız orqanizmin ehtiyac duyduğu mineralların əksəriyyətini su vasitəsilə qəbul edirdilər. Biz isə məcburən maqneziumu, kalsiumu, sinki, flüoru qida əlavəsi kimi qəbul edirik; suyumuz filterdən keçib axı.

Ən faydalı su bulaq suyudur. Çünki onun tərkibi minerallarla zəngindir. Torpağa, qayaya təmas edə-edə gəlib bizə çatan su orqanizmin əksər mineral ehtiyacını ödəyir. Bəs, şəhərin mərkəzində yaşayan insanlar bulaq suyunu necə əldə etsinlər? Bunun da çarəsi var. Evə gələn suya filter taxın, amma filterdən keçmiş suya mineral su əlavə edin. Beləcə, tərkibi zəngin su əldə edəcəksiniz. Ən azından, maqneziumun, kaliumun bir qismini təbii yolla-su ilə qəbul edin.

İndi mənə sual verəcəksiniz ki, niyə mineral suyu adi suya qataq? Onu hər gün alıb içə bilmərikmi? Bəli, hər gün mədən suyu içən insanlar da var. Bu zaman orqanizmdə mineral artıqlığı yaranır. Yəni balanslı şəkildə qəbul edilməlidir. Mineral və adi su qəbulunu növbələşdirməlisiniz.

Bulaq suyu filterə ehtiyac duymur; onun təbii filteri var-torpaq. Marketdə satılan bulaq suları ilə bulağın gözündən içilən su arasında fərqi hiss etdiyiniz olub? Səbəb odur ki, həmin bulaq suyu süfrələrimizə gələnədək müəyyən prosedurlara məruz qalır. Yəni bulaq suyunda hansısa mikrob ola bilər, amma təmizlənməyə məruz qalmış bulaq suyunda bunlar olmaz.

Bir də, suyu hansı qabda almaq məsələsi var. Plastik qabdakı suyun içində mikroplastik olması ehtimalı böyükdür. Şüşə qablardakı suları almağa üstünlük versəniz, yaxşı olar. Əgər plastik qabdakı suyu almısınızsa, çalışın, onu günəş işıqlarından uzaq tutasınız. Günəş işığına məruz qalan plastik qabdakı suya yüksək miqdarda mikroplastik qarışır. Hərdən istehsalçılar insaflı çıxır, şüşələrin üstündə yazırlar: “sərin və qaranlıq yerdə saxlayın.” Bu xəbərdarlığa əməl etmək isə sizə qalıb.

Mikroplastiklər xərçəng növlərinin əmələ gəlməsini sürətləndirir, ürək-damar sistemində tıxanıqlıq yaradır, diabeti ağırlaşdırır. Estrogen səviyyəsini yüksəltməsi ilə bağlı araşdırmalar isə son illərdə aparılıb. Və nəticə heç də ürəkaçan olmayıb…

Qısaca desəm, şüşə qabda marketdən alınmış bulaq suyu krant suyundan da, filterdən keçmiş sudan da, hətta bulağın gözündən içilən sudan da daha faydalıdır.

İnsan orqanizminin pH-ı 7,4-dür. İçdiyimiz suyun pH-ı 6,7 ilə 7,0 arasındadır. Gün ərzində 2-2,5 litr su içməliyik ki, orqanizmimizin pH dəyəri çox dəyişməsin. Amma suyun miqdarını azaltdığımızda, yaxud “maye” təsəllisiylə şirələr, ayran, digər içkilər içdiyimizdə orqanizmimiz qocalmağa tələsir. Gənc qalın, faydalı su için, ən əsası, sağlam olun!