افيدوني

افيدونى ينوبكو ثواب فيّا

اسمها اية الحالة دى هيّة

انا بزعل و بشيط و ادّايق

وبزّعق و اشخط و اتخانق

و مش عارف..

لية باروق فى دقايق

مجنون و لا دى حاجة عادية !!!

بنى أدم واضح و صريح

احساسى دايما مفضوح

و كلامى مش كله مريح

و لا تعرف امتى انا مجروح

رغم انه بيبان فى عنيّه

افيدونى ينوبكو ثواب فيّا

مجنون و لا دى حاجة عادية !!!

ف مشاكل على طول مع نفسى

و كيفى فى إن انا اكلم نفسى

الأن انا قلبى دة طيب

بيحب الناس كدة و قرّيب

تيجى عليّا يا نفسى و تقسى ؟

بانسى ان حد فى مرة اساء لى

و اجرى علية لو كان زعلان

مش عايز حاجة غير انى

ارتاح فى الدنيا دى لأنى

مخلوق جوايا الانسان

بحب الدنيا بكل ما فيها

و بكرّة موت لو أنام ندمان

دا عادى و لاّ دا عيب فيّا..

دا جنون....

و لا دى حاجة عادية...!!!