Gigi梁詠琪完成5場sidetrack音樂會感覺人生解鎖

台上分享96年人生第一張廣東唱片簽唱會報紙廣告
歌迷完場拒離座嗌Encore 臨時加唱鋼琴版《灰姑娘》
Gigi梁詠琪完成5場sidetrack音樂會感覺人生解鎖
 
一連五場在演藝劇院舉行的《梁詠琪 時間遇上我們～專屬的特別》Side Track音樂會，昨晚（十二月一日）完滿結束，Gigi梁詠琪特別為尾場觀眾額外送上《哭了》和自己作曲的《同班同學》，但現場觀眾依然意猶未盡，完騷仍拒絕離場，不斷嗌encore，最終Gigi再度上台，在音樂總監趙增熹即興鋼琴伴奏下獻唱經典歌《灰姑娘》，全場大合唱，為五場Side Track音樂會完美落幕。
 
終於完成首個在香港舉行的全廣東歌Side Track音樂會，Gigi以「人生解鎖」來形容，她說：「因為未試過搞一個小型、主力唱side track歌嘅音樂會，今次的歌單特別有感覺，例如我揀嘅成長三步曲，《好不好》、《因果》、《等人》，這些歌很出色，我不時都會攞番出嚟聽，有好多回憶喺裡面，揀歌方面自己就好滿足，當然歌迷依然有海量嘅要求，哈哈！真係唱唔晒呀。」
 
提到最難忘的晝面，Gigi坦言是在第四和第五場，因為太投入整個舞台表演而感動哽咽，很多感覺湧上心頭。
 
「例如今晚唱《好不好》，我只是好投入去唱，但突然間，唱到某句歌詞，點知好想喊，要即刻㩒住自己，唔好太過激動，因為會影響唱歌。仲有第四場唱《迴旋木馬的終端》，因為見到有台下歌迷流淚，我又忍唔住，你知我一見到人喊就會被感染，而且呢啲歌陪住我好耐，亦都陪住佢哋，呢幾晚我哋一齊製造咗一個回憶嘅畫面，用『感動』都形容唔到，係大家一齊陪我經歷咗這個過程的那種滿足感同開心。」
 
今次《梁詠琪 時間遇上我們～專屬的特別》Side Track音樂會，以「回憶」作為主軸，將戲劇元素加入舞台，她邀請了同公司的小師弟Henry陳獻略，在台上演搬屋的獨腳戲，在執拾家裡物件時，回想起了一幕幕的舊人舊事舊片段。
 
「我同Henry一齊喺舞台，製造了一個平衡時空，雖然冇交匯過，卻反而製造一種『觸不到的距離』的美，我覺得Henry做得好好，又要彈結他又要做戲，我見到佢有段戲眼濕濕。」
 
在旁的Henry說：「首先要多謝Gigi 嘅信任，同埋我好鍾意個故事，其實我搬屋嘅時候，思緒都會好複雜，所以好容易代入到個情景裡面，其實綵排嘅時候，一聽到《春逝》我已經喊咗出嚟，同埋每晚我感覺都好唔同，情緒會有唔同起伏，每晚嘅演繹方式都有唔同。」
 
提到回憶，每晚Gigi都會在台上分享不同的昔日珍藏，在首場她拿出19歲初入行時為日本雜誌《少年JUMP》拍攝的封面，20歲時到非洲拍攝的寫真集《赤道の燃燒》、留了一把長髮的手錶廣告、第一套參與的電影《流氓醫生》LD影碟、1996年首張個人廣東碟簽唱會報紙全版廣告，這全都是Gigi與歌迷的美好回憶。
 
至於第一次在演藝劇院做音樂會，Gigi覺得好特別，雖然場地呈半圓形，但其實有四面台效果，笑言根本「無位匿」，尤其第四晚唱《迴旋木馬的終端》時被歌迷感動落淚，工作人員遞紙巾給她抹淚擤鼻涕，即使背向觀眾，依然被看得一清二楚。
 
「個舞台好靚，係一個八角形，加上台面用木紋地毯砌成，感覺好warm，觀眾同我好近，feel到又見到晒佢哋，非常enjoy 喺呢度做音樂會。」
 
來到Side Track音樂會最後一場，Gigi特別派福利，額外唱出《哭了》和自己作曲的《同班同學》，但完場後歌迷依然唔捨得走，不斷大叫Encore，最終Gigi唱《灰姑娘》作結，更與全場歌迷大合唱，她說：「其實《哭了》喺我side track入面，本來沒有特別鍾情，當年亦冇主打，但呢十幾廿年，歌迷不斷要求我唱，漸漸令我都留意番呢首滄海遺珠。多謝歌迷令呢首歌由遺珠成為我們的經典，所以尾場一定要再唱。同埋我冇諗到，佢哋真係坐喺度唔走，不停嗌encore，搞到紅館show咁，一於送多首《灰姑娘》大家開心。以為要清唱，點知趙增熹即興加入伴奏，好犀利！送多首安靜版《灰姑娘》，見到大家都滿意同開心，搞到我自己都唱到唔捨得走。」


==========================
🎤HONG KONG SINGER CHANNEL🎤
💛讓每一個人唱出心聲💛Let Everyone Sing From Their Heart💛
Follow我哋👇🏻👇🏻🥰🥰
▶️Facebook: Hong Kong Singer Channel
▶️Youtube: hksingerchannel
▶️Website: www.hksingerchannel
▶️Instagram: hkscchannel

#hksingerchannel #hongkongsingerchannel #香港歌手 #hksinger #hksinging #hkscchannel