Maulana Syed Muzaffar Husain Tahir Jwarwali Ep.103مولانا سید مظفر حسین، طاہر جرولی

خطیب الایمان سید مظفر حسین معروف بہ مولانا طاہر جرولی ۳۱ /دسمبر ۱۹۲۹عیسوی کو شہر علم و ادب سے 80 کلومیٹر دور، بہرائچ ضلع کے قصبہ جرول کے ایک دیندار اور تعلقہ دار گھرانے میں پیدا ہوئے۔ آپ کا سلسلہ نسب چند واسطوں سے حضرت امام رضا علیہ السلام سے ملتا ہے آپ کے والد سید نظیر حسین رضوی جرول ضلع بہرائچ کے تعلقدار تھے۔ طاہر جرولی کی والدہ مدافع ولایت، صاحب عبقات الانوار، علامہ میرحامد حسین موسوی کی پوتی اور سرکار ناصر الملت، آیت اللہ سید ناصر حسین موسوی کی بیٹی تھیں۔
موصوف کی عمر ابھی صرف ۱۴ سال تھی کہ آپ اپنے والد کے سایہ سے محروم ہو گئے۔ آپ کے ماموں نصیر الملت اور سعید الملت نے اپنی عاطفت و محبت سے آپ کی پرورش کی۔
خطیب الایمان کی ابتدائی تعلیم کا آغاز سرکار ناصر الملت نے "بسم اللہ" سے کرایا۔ آپ نے گھر ہی پر قرآن مجید، دینیات، اردو، اور فارسی کی تعلیم حاصل کی۔ آپ نے شیعہ کالج میں پانچویں درجے سے اپنی تعلیم کا آغاز کیا اور وہاں سے انٹرمیڈیٹ تک تعلیم حاصل کی۔ شیعہ کالج کے بعد آپ نے لکھنؤ یونیورسٹی میں داخلہ لیا اور اپنے تعلیمی سفر کو جاری رکھا۔ موصوف نے سن ۱۹۵۲عیسوی میں بی۔ اے کی سند حاصل کی اور پھر اسی یونیورسٹی سے ایل۔ ایل۔ بی کی تعلیم مکمل کی۔
قانون کی تعلیم مکمل کرنے کے بعد آپ نے قیصر گنج، بہرائچ اور لکھنؤ میں کچھ وقت وکالت کی مگر آپ نے اسے ذریعہ معاش قرار نہیں دیا۔مولانا ممتاز علی مرحوم کے بقول خطیب الایمان فرماتے تھے: میں نے وکالت کو پیشہ بنانے کے بجائے، محمد و آل محمدؐ کی وکالت کو اپنا نصب العین سمجھا۔ موصوف تا حیات اپنی تقاریر کے ذریعہ حقانیت اہلبیتؑ ثابت کرتے رہے یہاں تک کہ کلکتہ کے عشرہ میں ہزاروں افراد کو راہ حق دکھایا آپ نہایت باادب، منکسرالمزاج اور طلبہ نواز شخصیت تھے موصوف طالب علم کو سلام کرنے میں پہل کیا کرتے تھے۔
آپ نے عصری تعلیم کے ساتھ دینی تعلیم کا سلسلہ گھر پر جاری رکھا جہاں نصیر الملت اور سعید الملت نے آپ کی مذہبی معلومات میں اضافے کے لیے خصوصی توجہ دی۔ اس کے علاوہ، آپ نے شیعہ کالج میں ملا احمد حسن سے بھی کسب فیض کیا۔
مولانا طاہر جرولی نے اپنی ذاکری کے سفر کا آغاز جرول میں مرثیہ خوانی سے کیا اور جلد ہی مرثیہ خوانی، علماء و فقہاء کی زیر نگرانی میں خطابت میں تبدیل ہو گئی۔ آپ نےسن ۱۹۴۶عیسوی تک باقاعدہ مجالس پڑھنا شروع کردیں اور سن ۱۹۵۸ عیسوی میں مومنین کے اصرار پر آپ نے جرول سے باہر قدم رکھا اور کراچی کے مارٹن روڈ کے امام باڑے میں پہلا عشرہ محرم پڑھا جو بے حد پسند کیا گیا۔ کلکتہ کے لوگوں کے اصرار پر، آپ نے سن ۱۹۶۱ سے ۱۹۸۱ تک مسلسل بیس سال کلکتہ میں عشرہ محرم پڑھا۔
خطیب الایمان کی خطابت کا دائرہ آہستہ آہستہ ملک اور بیرون ملک کے افق پر پھیل گیا۔ آپ نے ذاکری کے ذریعے ہندوستان کے گوشے گوشے اور بیرون ملک یورپ، امریکہ، افریقہ، کینیڈا اور خلیج کے ممالک کے متعدد سفر کیے۔
آپ کی عشرہ مجالس پر مشتمل کتابیں 'مودّتِ اہل بیت'قرآن اور اہلبیت ، وسیلہ ,اسلام اور عزاداری اورنجات شائع ہو چکی ہیں۔
مولانا طاہر جرولی آل انڈیا شیعہ کانفرنس کے تین سال تک جنرل سکریٹری رہے اور سن ۱۹۸۰عیسوی میں بمبئی میں ایک عظیم اور یادگار اجلاس منعقد کیا جسے آج بھی یاد کیا جاتا ہے۔ آپ انجمن تحفظ حسینیت کے سرگرم رکن اور سن ۱۹۷۶ سے تادم مرگ صدر رہے۔ اسکے علاوہ موصوف زندگی کے آخری لمحوں تک شیعہ کونسل کے چیئرمین رہے۔
اللہ نے آپ کو 2 بیٹیاں ا¬ور 4 فرزند عطا کئے جنکومولانا سید میثم کاظم جرولی،مولانا سید عمار کاظم جرولی ، مولانا سید عابس کاظم جرولی اورمولانا سید شوذب کاظم جرولی کے نام سے پہچانا جاتا ہے
خطیب الایمان، یکم دسمبر ۱۹۸۷عیسوی بروز منگل، ایران کے شہر تہران میں امام زادہ شاہ عبدالعظیم کے حرم کے نزدیک ہوٹل میں اچانک طبیعت خراب ہونے کے سبب بیڈ کی بجائے قالین پر ہی لیٹ گئے۔ جب آپ کو حرکت دی گئی تو موصوف نے کوئی جواب نہ دیا۔ ڈاکٹر کی تشخیص کے مطابق آپ اپنے خالق حقیقی سے جا ملے۔ اناللہ و انا الیہ راجعون۔ آپ کا جنازہ تہران سے مشہد لے جایا گیا۔ بہشت امام رضا ؑمیں غسل و کفن کے دوران، غسال نے حیرت کا اظہار کرتے ہوئے کہایہ پہلی میت ہے جسے ۴۸ گھنٹے گزرنے کے باوجود ایسا محسوس ہوتا ہے جیسے مرحوم محوِ خواب ہوں۔
آپ کے جسد خاکی کو ۳ دسمبر۱۹۸۷ عیسوی میں مشہد مقدس آستانہ رضوی میں، امام رضا علیہ السلام کی قبر سے ستر قدم فاصلے پر سپرد خاک کر دیا گیا۔
ماخوذ از : نجوم الہدایہ، تحقیق و تالیف: و مولانا سید رضی زیدی پھندیڑوی، ج10، ص234 دانشنامۂ اسلام، انٹرنیشنل نورمیکروفلم دہلی، 2024ء
ShiaOlama #Biography #Documentary #Islam #noormicrofilm #ShiaHistory #IslamicVideo