شيلة مهداة للشيخ نوار العصيمي كلمات شاعر الملك ضيف الله العضياني آداء مهنا العتيبي

مونتاج أبعاد الإبداع للمونتاج
0504422987
في ساحة الفكر بين البوح والأرتجال ؛
أسرجت لي مهرةً مايقصر عنانها ..

تطوي دروب التميّز من يمين وشمال ؛
ماكنّها ألا تبختر وسط ميدانها ..

متغطرسه كنّها فالوصف درّة جمال ؛
كلاً يبيها ولا يقدر على أثمانها ..

إلا فكر ديدنه مايعشق ألّا الجزال ؛؛
من أبتكار البيوت يقدّم سمانها ..

الشعر نبض المشاعر عبر نسج الخيال ؛
والفكره النادره تستدرج ألحانها ..

يغريني المدح في سيرة كريم السّبال ؛
ويشوش راسي فخر من قوّ سلطانها ..

راعي يميناً كرمها مثل وبل الخيال ؛
وبيوتاً مشرّعاً للضيف بيبانها ..

نوار لا جاء لوقفات النشاما مجال ؛
مواقفه بالفخر ترجح بميزانها ..

بن دخيل الله بن عديس واف الخصال ؛
شيخاً صعد بالمراجل وأهتوى شانها ..

سطوة عزومه تزلزل راسيات الجبال ؛
في كلّ موقف يجمّل تكسب ارهانها ..

الشامخ اللي شموخه فيه مضرب مثال ؛
بالهيبه اللي تخلّد صيت شجعانها ..

صيته شهر بالمكارم بين كلّ الرجال ؛
ومسيرته بالتميّز صاغ عنوانها ..

يستاهل ونعم لوّ النعم صعب المنال ؛
مواقفه وثّقت بالنعم برهانها ..

من ضامه الوقت يلقابه ملاذ وظلال ؛
يقدم على الطايله ويثبّت أركانها ..

شيخاً ليا جيت يمّه بالحمول الثقال ؛
همومك اللي معك تبشر بنسيانها ..

منصى على سمعته كلاً يشدّ الرحال ؛
ومجالسه عامره من كثر ضيفانها ..

سفيرنا في قطر يبقى لنا راس مال ؛
شيخاً تباهابه الدوحه وسكانها ..

وتفخر به عتيبه الهيلا على كلّ حال ؛
مثل افتخار السعوديه بسلمانها ..

من روس قوماً تنومس من قديم الليال ؛
قبيلةً فالمواقف طالت أيمانها ..

ألا عاصم شموخ أمجادهم لايزال ؛
وفعولهم يحفظ التاريخ فرسانها ..

أمجادهم معجزه عنها يزول الجدال ؛
من دون قاصر بكلّ الرّوس وأوطانها ..

يابو حمد ودّي بمدحك يطول المجال ؛
لكنّ شرد القوافي شحّت أوزانها ..