🎉 "კავკასიური სახლის" სახალხო უნივერსიტეტის ალმანახი "ჩვენი სამყარო" 5 წლისაა.

🎉 "კავკასიური სახლის" სახალხო უნივერსიტეტის ალმანახი "ჩვენი სამყარო" 5 წლისაა.

📅 29 სექტემბერს, 17 საათზე "კავკასიური სახლის" იორგ ჰენლეს სახელობის დარბაზში გაიმართა საიუბილეო, მეხუთე ნომერის წარდგენა.

📙 კრებული აერთიანებს შემდეგ განყოფილებებს:

🔸კვლევები და პუბლიცისტიკა
🔸პოეზია
🔸პროზა
🔸მხატვრული თარგმანი
🔸არქივიდან

📒 ალმანახში იბეჭდება "კავკასიური სახლის" სახალხო უნივერსიტეტის მსმენელთა და გულშემატკივართა, პროექტის დიდი წრის წარმომადგენელთა ნამუშევრები.

🗨️ "უკვე ყველანი ვგრძნობთ, რომ ახალი ტიპის, ინფორმაციულ საზოგადოებაში ვცხოვრობთ. მთელი დღის განმავლობაში უამრავი საინფორმაციო ტალღა გადაგვივლის ხოლმე. ყველა საქმის მოგვარება ელექტრონული საშუალებებით არის შესაძლებელი. თითქოს ასეთ გარემოში ჟურნალისა და ალმანახის ადგილი აღარ რჩება. ყველას ინდივიდუალურად, თავისი არხით შეუძლია საკუთარი შემოქმედების პოპულარიზება და მკითხველთან მიტანა.

საქმე ასე მარტივადაც არ არის.

სოციალურ მედიაზე ხელმწისაწვდომობა განსაკუთრებულ პრობლემებს წარმოქმნის. მაგალითად, ადამიანებს ძალიან უჭირთ ციფრულ ოკეანეში ორიენტირება, წყაროების გაფილტვრა, არც იციან სად ეძებონ სასურველი შინაარსის მასალები, არ იციან რომელ ინსტიტუტს გამოუცხადონ ნდობა. ველი დაბინძურებულია ათასი უსარგებლო მასალით.

ამგვარ ვითარებაში ალმანახი ასრულებს ერთგვარი შუქურის როლს, რომელიც ადამიანებს გეზის არჩევაში ეხმარება. ჟურნალის უკან რედაქცია დგას, თავისი ღირებულებებით, ლიტერატურული გემოვნებითა და სტანდარტებით, მრავალწლიანი გამოცდილებით. რედაქცია საკუთარ სახელსა და ავტორიტეტს პატივს სცემს, ამიტომ ცდილობს გვერდი აუაროს მდარე შინაარსის ნაკადებს.

უკვე ხუთი წელია „კავკასიური სახლი“ გამოსცემს ალმანახს „ჩვენი სამყარო“, სადაც სახალხო უნივერსიტეტის მსმენელთა და გულშემატკივართა ტექსტები იბეჭდება. ჩვენი მიზანია „კავკასიური სახლის“ წრეში აღმოჩენილ ახალგაზრდებს პირველი ნაბიჯების გადადგმაში დავეხმაროთ. ზოგიერთი თავიდანვე მწყობრი სვლით მიიწევს წინ, წაბორძიკების გარეშე ახერხებს წინააღმდეგობების გადალახვას. არიან ისეთებიც, რომელთაც უჭირთ გაბედვა, მძიმედ მოძრაობენ, მაგრამ არ ჩერდებიან, ფარ-ხმალს არ ყრიან და მონდომებით ცდილობენ დამსახურებული ადგილის მოპოვებას. ერთი სიტყვით, ჩვენი ჟურნალი ჩვენს საზოგადოებას, მის ახალგაზრდულ ნაწილს სრულად აირეკლავს, თავისი მიღწევებითა და გამოწვევებით, რაც მკითხველს შესაძლებლობას აძლევს ჩვენი მომავალის მაჯისცემა შეიგრძნოს.

დიდი მადლობა ბ-ნ მიხო ბეროშვილს, რომელიც თავისი კეთილშობილებითა და საქმის სიყვარულით ათობით ახალგაზრდას შთააგონებს, რომ შემოქმედებით ასპარეზზე სცადონ ბედი. მისი გონივრული რჩევები ნამდვილი საჩუქრებია, რომლებიც ბევრს მუდმივი ზრდისა და განვითარების ბედნიერებას უნაწილებს.

იმედი მაქვს, ჟურნალი არ დაკარგავს ჩვეულ სიცოცხლისუნარიანობას და მომავალშიც არაერთ ადამიანს გაუხნის გზას უკეთესი სამყაროსკენ."

✍️ ლევან ლორთქიფანიძე
„კავკასიური სახლის“ თავმჯდომარე