Жекеменшік мектептен коммуналдық меншікке

#qyzylordatv
Жекеменшік мектептен - коммуналдық меншікке. Иә, бұл тақырып аясында біздің телеарна өткен аптада арнайы сюжет берген болатын. Еске сала кетейік, жылжабар желтоқсан айында жерлесіміз, мемлекет және қоғам қайраткері Мұрат Бақтиярұлы Сабалақ елді мекеніндегі Орда скул оқу ошағын облыстық коммуналдық меншікке өткізу туралы шешім қабылдап, қос тарап арнайы меморандумға қол қойған болатын. Бүгін біз аталған тақырыпты тағы бір ой елегінен өткізсек деп отырмыз.

Қызылорда облысы да еліміздің біраз өңірі секілді жеке мектепке кенде емес. Шыны керек, кезінде мемлекеттік тапсырыс орналастыру жоғары жақтан келетіндіктен, жергілікті жердегі дефицит пен профициттің балансына ешкім бас ауырта қойған жоқ. Оның салдары аяқсыз қалмасы саналы түрде сараптай алатын адамға аян ғой. Бүгінде пилоттық жобаға сәйкес, мемлекеттік тапсырыс жергілікті атқарушы органдарға міндеттелді. Жеке мектептерден мемлекеттік тапсырысқа өтініш қабылдау үшін ҚР Қаржы министрлігі тарапынан «Орта білім» электрондық платформасы әзірленіп, аймақтағы 39 мектептің 37-сі тіркелді. Конкурс нәтижесімен тиісті талапқа сәйкес келген 2 мектепке мемлекеттік тапсырыс берілді. Яғни, конкурстан жеке мектептің бәрі дерлік өте алған жоқ. О баста жеке мектептерді ашудағы басты мақсат бұл - мемлекет қаржысы есебінен мектеп құрылысын салуға мүмкіндігі жоқ елді мекеннің мәселесін шешу болатын. Дегенмен, жекеменшік мектептер ашылған Қызылорда қаласында 27 448 орын, Шиеліде -3 914, Жаңақорғанда - 4 630 орын, мемлекеттік мектептерде 35 992 бос орын – профицит қалыптасты, яғни, көптеген жекеменшік мектептер сол елді мекендегі оқушы санын есепке алмаған, жергілікті атқарушы органның келісімін алмаған. Алайда мемлекеттен ақша алған. Яғни, мемлекеттік мектептер орналасқан мөлтек аудандарда бірнеше жеке мектептердің шоғырлануына алып келуде. Осылайша үй ішінен үй тігіле берген.

Жалпы жеке мектептердің мемлекеттік тапсырысы ҚР Білім және ғылым министрінің 2017 жылғы №597 бұйрығымен бекітілген «Жан басына шаққандағы қаржыландыру» әдістемесіне сәйкес, орташа есеппен бір балаға 1 жылға 650 мың теңге көлемінде төленеді. Сонымен қатар, аталған әдістемеде бір баланың оқу құнынан бөлек, құрылысы салынған жеке мектептерге бір оқушы орнына 1 жылға жаңа құрылысқа 377,5 мың теңге, реконструкциға - 184,8 мың теңге көлемінде 8 жыл төленуде. Облыста жұмыс жасап келген 39 мектептің 29 мектебіне құрылыс бойынша республикалық бюджеттен 2020-2025 жылдары 8 млрд теңге берілген. Енді қараңыз, 400 орындық мектеп құрылысына 1 жылда бала саны толық болған жағдайда 166,1 млн теңге, 8 жылда 1,3 млрд төленеді. Бұдан бөлек, тағы әр баланың оқу құнына орташа 650 мың теңгеден 1 жылға 260 млн теңге, 8 жылда 2,1 млрд теңге беріледі.Облыстағы 400 және 600 орындық жеке мектептердің орташа құны 682,6 млн теңгені құрайды. Осылайша, құрылыс қаржысын 8 жылда 2 есеге дейін артық алып, 4 жылда жалпы құрылыс шығынын өтеуге мүмкіндік жасалған. Көрдіңіз бе, қаражаттың көлемін! Жалпы осы жерде белгілі құрылтайшы Сейітқали Алшынбаевтың «Бір нәрсені естен шығармау керек, жеке мектеп – баюдың жолы емес, ол болашақ білімді ұрпақтар қатарын толықтыруға сеп болудың жолы» деген сөзі тағы еске оралады

Аймақта алғашқылардың бірі болып жеке мектеп салған Мұрат Бақтиярұлы. Бүгінде оның иелігіндегі «Orda school» жекеменшік мектептер желісі 4-ке жетті. Құны 520 млн теңге тұратын Сабалақ саяжайындағы 400 орындық «Orda school-2» жеке мектебі енді облыстық коммуналдық меншікте, бүгінде тиісті құжаттары рәсімделуде , - дейді құзырлы басқарма өкілі

Бұған дейін Орда скул жеке мектебінде 336 оқушы тегін оқып келді. Енді бұл білім беру ұйымы №297 орта мектеп болып қайта құрылып, мемлекеттік мекеме ретінде жұмысын жалғастырады. Және оқушылар саны артады деген сөз. Бұл жылжабар желтоқсанның жарқын жаңалығы болды және өзге кәсіпкерлер үшін өнеге болды деуге негіз бар.

Сайт - https://qyzylordatv.kz/ru/live
Facebook -   / qyzylordatv  
Instagram -   / qyzylordatv  
Telegram - https://t.me/qyzylorda_tv
Tiktok -  / qyzylorda_tv