Темір тұлпар бар, тірі тұлпарды алу, баптау идеясы қайдан келді?

Алматы облысы, Тұрар ауылында бір ерекше жан бар. Аты аңызға айналған бәйгелердің тынысын дәл танып, әр тұлпардың мінезін жүрегімен сезетін, атбегілік өнерін өмірінің мәні еткен – Секенай ағамыз.

Секенай аға 2023 жылы Таскескенде жасаған үлкен тойымда бәйгеге қатысып Мамай Қарамен жүлдеге жетіп автокөлік иеленген екен. Кейін 2025 жылы тағы да Таскескендегі тойымда ұлы екеуімен бірге бәйге көрігін қыздырып жүрген жерінен жолымыз түйісіпті. Көргенім бар, таныстығым жоқ еді, енді міне бүгін жақынырақ білісудің реті келді.

Тоқтар Серіков ағамыздың тойында Нұрсейіт бауырыммен бір дастарханда отырдық. Ол сол кезде Абайдың 180 жылдығын орай өткен шарада ат бәйгесінен бірінші орын алған екен. “Талғат аға, сіз де елде талай үлкен той өткізіп жүрсіз. Темір тұлпарыңыз бар, енді бір тірі тұлпар мінсеңізші” деген жақсы ұсыныс тастады. Сол әңгіменің үстінде Жандарбек бауырымыз тағы сәйгүліктің атын «Q4 Tulpar», ал екіншісіне «Тас Вегас» деп ат қоюды ұсынды. Елімізде талай дүбірлі бәйгенің дауысы мен жүрегіне айналған комментатор Елдос Үмбетәлі де көп күттірмей, сол жерде-ақ шабытқа мініп: «Жұмыр тұяқпен жантпласып, Q4 Tulpar шауып келеді!» – деп, жоспардағы атымызға жан бітіргендей әсерлі комментарийді төгіп жіберді. Сол сөздің өзі жүрекке бір ыстық леп әкелді. Q4 Tulpar-дың топ бастап келе жатқанын естіген сәт жанымды ерекше қуанышқа бөледі. Оның үстіне, мұның бәрі қасиетті жұма күні орын алғаны да бекер емес, Алланың берген белгісі деп түсіндім.
Осы сезіммен мен тұлпар алуға кесімді шешім қабылдадым.

Ал енді бүгін бағым мен бабын Секенай ағамызға сеніп тапсыруды жөн көрдік. «Шымшық сойса да, қасапшы сойсын» дейді қазақ. Жылқы баптау екінің бірінің қолынан келмейтін үлкен өнер. Уақытым тығыз болғандықтан, бұл істі өз саласының шеберіне тапсырған дұрыс деп шештім. Алда талай бәйгелер бар: «Көшпенділер» ойындары, түрлі өңірдің тойлары, Жамбыл атамыздың дүбірлі мерекесі… Солардың бәріне ат қосып, өз үлесімізді қоссақ деген ниет күшті.

Бұрын Секенай ағамен сырттай ғана таныс болсам, ал бүгін оның ақ дастарханынан дәм татып, тірі тұлпарларымды өз қолымен таңдап баптайтынын айтып, ақ батасын алған сәт ерекше бір рухани байланыс болды.

Тілегім – бұл тұлпар Секенай ағамыздың қолында бағы жанып, талай дүбірлі додада топ жарып, еңбектің берекесін арттырсын.

Секенай аға, еңбегіңіз жана берсін! Еліңізге, жұртыңызға қызмет ете беріңіз! Жолыңыз да, тұлпарларыңыз да әрдайым алда болсын! 🇰🇿🐎✨