Klan News - Zogaj, fshati që po zbulohet nga turistët

Në gjirin e liqenit të Shkodrës, vetëm pak kilometra larg qytetit, shtrihet Zogaj, një fshat piktoresk që gjithnjë e më shumë po kthehet në një destinacion turistik të kërkuar. Me shtëpi karakteristike buzë ujit, natyrë të paprekur dhe një qetësi që të largon nga zhurma e përditshmërisë, Zogaj është kthyer në zgjedhjen ideale për pushues vendas dhe të huaj.

Peizazhi i mrekullueshëm, ku bashkohen qetësia e liqenit dhe gjelbërimi i malit të Taraboshit, ofron jo vetëm relaks, por edhe mundësi për eksplorim, shëtitje, not dhe udhëtime me varka. Bukuria e natyrës dhe mikpritja tradicionale kanë bërë që këtë verë Zogaj të vizitohet nga turistë nga e gjithë bota.

“Jemi nga Belgjika. Është hera e parë që vizitojmë Shqipërinë dhe hera jonë e parë këtu, sigurisht, dhe po e shijojmë vërtet. Ajo dëshironte të shihte liqenin dhe këtu ka një pamje shumë të këndshme. Siç e shihni, është shumë këndshëm dhe kjo është arsyeja. Mendoj se është natyra dhe qetësia këtu; është kaq e bukur dhe e qetë. Kemi parë shumë zogj, peshq, specie të tjera dhe po, ishte diçka që po e kërkonim për pushimet tona. Do të qëndrojmë këtu për disa ditë, rreth pesë ditë, dhe në Shqipëri në total dy javë. Ndoshta do ta mbanim sekret vetëm për vete, por mendoj që kur të kthehemi do të flasim për këtë vend, sepse është vërtet i bukur dhe e kemi shijuar shumë”, thotë një çift turistësh.

“Jam nga Kanadaja, Montreali, dhe po, në këtë vend do të qëndrojmë dy ditë. Liqeni, temperatura e liqenit, mali dhe njerëzit, është shumë bukur, shumë i veçantë, shumë i këndshëm. Të notosh, perëndimi i shkëlqyer ishte shumë i këndshëm dje”, shprehet një tjetër turiste.

Infrastruktura rrugore sezonin e ardhshëm do të jetë tërësisht e investuar në segmentin Shirokë–Zogaj, ndaj pritet të ndikojë drejtpërdrejt në rritjen e turizmit, duke e bërë zonën më të aksesueshme dhe tërheqëse për turizmin ditor dhe atë familjar.

Në Zogaj nuk ka ende hotele të mëdha, por turizmi është zhvilluar përmes bujtinave dhe dhomave të ofruara nga vetë banorët, duke ruajtur autenticitetin dhe kontaktin e drejtpërdrejtë me jetën rurale shqiptare.

Me potencial të madh për zhvillim të qëndrueshëm turistik, Zogaj mbetet një zonë që duhet zbuluar dhe ruajtur, një thesar natyror e kulturor që i jep Shkodrës një dimension të ri në hartën turistike të Shqipërisë.

Klan News

SUBSCRIBE to "RTV KLAN" on YouTube for more videos!
Për më shumë informacione vizitoni faqen tonë web https://tvklan.al/kategoria/klan-news/
Follow Klan News on Facebook:   / klannews  
Follow @klannews on Instagram:   / tvklannews  
#KlanNews #KlanNewsLajme #TvKlan