"ტორპედოს" გულშემატკივრების საპროტესტო აქცია და შეხვედრა ქალაქის მერთან

📌 გამოგვყევით Youtube-ზე http://bit.ly/M3GAtv 👈
„აღარ მოვითმენთ! აღარ მოვტყუვდებით! აღარ გაპატიებთ!“ - ამ ლოზუნგებით ქუთაისის „ტორპედოს“ გულშემატკივრები ქალაქის თვითმართველობის შენობის წინ შეიკრიბნენ და კლუბისთვის საჭირო თანხის მოძიება კიდევ ერთხელ მოითხოვეს. მათი თქმით, გუნდში უკიდურესად რთული ვითარებაა, მესამე თვეა ახალ მოსულ ფეხბურთელებსაც კი ხელფასები არ აუღიათ, ფეხბურთელები სახელფასო დავალიანების გამო ვარჯიშზე უარს ამბობენ, მათ საკვებიც კი აღარ აქვთ. ტორპედოს გულშემატკივრებს ერთი მიზანი აქვთ, ნებისმიერი გზით შეინარჩუნონ ქუთაისის ერთადერთი საფეხბურთო კლუბი.
ფანების დაჟინებული მოთხოვნის შედეგად ქუთაისის მერი მათ სხდომათა დარბაზში შეხვდა. შეხვედრას მერიის იურიდიული გნყოფილების უფროსი და კლუბის ახლადდანიშნული დირექტორი თემურ ჩეჩელაშვილიც ესწრებოდნენ. „თუ მერია გუნდის დაფინანსებას ვერ შეძლებს, ინვესტორი მაინც უნდა მოიძიოს“ - განაცხადეს გულშემატკივრებმა ქალაქის მერთან შეხვედრისას. საპასუხოდ გიორგი ჭიღვარიამ განაცხადა, რომ კანონმდებლობა მას კერძო საფეხბურთო კლუბის დაფინანსების შესაძლებლობას არ აძლევს. მან ფანკლუბის წევრს ლევან ფილიპაშვილს შესთავაზა, რომ დირექტორის მოადგილედ დანიშნავს და უშუალოდ ჩაერთვება პროცესში.
შეხვედრაზე ქუთაისის მერმა „ტორპედოს“ ყოფილი პრეზიდენტის, ზაალ ჩაჩავას წინააღმდეგ, სასამართლოში სარჩელის შეტანას ხელი მოაწერა. პარასკევს კი, მერის დაპირებისამებრ გულშემატკივრები მერიის წარმომადგენლებთან ერთად ფეხბურთის ფედერაციას შეხვდებიან და საფეხბურთო კლუბის გადარჩენაზე იმსჯელებენ.

გუნდში რამდენიმე თვეა ფინანსური პრობლემებია. კლუბი ფეხბურთელებს ხელფასს ვერ უხდის, იგი ძირითადმა შემადგენლობამ დატოვა. გულშემატკივრები შიშობენ, რომ “ტორპედო” შესაძლოა საბოლოოდ დაიშალოს. კრიზისის მიუხედავად, გუნდი 12 სექტემბერს, საჩხერეში ეროვნული ლიგის მატჩისთვის ემზადება.