大工一lē指，小工磨半死 (POJ字幕)

Chú-káng 主講: A-Bêng
Pian-chi̍p 編輯: A-Bêng, Sió-Ka

Kin-ná-li̍t beh kā ta̍k-ke kài-siāu ê sio̍k-gí sī "Tōa-kang chi̍t lē chí, sió-kang bôa pòaⁿ-sí".

今ná日beh kā ta̍k-ke介紹ê俗語是「大工一lē指，小工磨半死」。

Lán tī gōa-bīn chia̍h thâu-lō͘ lóng to̍h ài hông hoah-khí-hoah-tó, chhiú-thâu ê sit-thâu á-bē soah, sûi to̍h ū pa̍t-hāng khang-khòe chiap-sòa lâi. Siāng chheh--ê sī téng-si piān-nā ōe-ang-á-ba̍k, ē-kha-chhiú--ê to̍h chò kah tōa-lia̍p kōaⁿ sè-lia̍p kōaⁿ.

咱tī外面食頭路lóng to̍h ài hông hoah起hoah倒，手頭ê穡頭á未soah，隨to̍h有別項khang-khòe接續來。Siāng chheh--ê是頂司便若畫尪á目，下腳手--ê to̍h做kah大粒汗細粒汗。

Chit kù sio̍k-gí sī kóng, téng-si óng-óng nā khí chi̍t lê liām-thâu, to̍h sûi-chāi i chí-hui. Lâng kóng chhut-chhùi--ê khah kán-tan, chip-hêng--ê chin oh chò, kha-sú chò téng-si--ê nā ē-tàng ke thé-liāng ē-si, án-ne chò tāi-chì ē ke khah ū hāu-lu̍t. Í-siōng, kám-siā siu-thiaⁿ.

Chit句俗語是講，頂司往往若起一lê念頭，to̍h隨在伊指揮。人講出嘴--ê khah簡單，執行--ê真oh做，khá-sú做頂司--ê若ē-tàng ke體諒下司，án-ne做代誌ē ke khah有效率。以上，感謝收聽。

【註腳】
ōe-ang-á-ba̍k (畫尪á目)：指使；發號施令。

#島嶼ê台語車幫 #Tâioânōe #台灣話 #Tâibûn #台文 #TâioânSio̍kgí #台灣俗語 #ChhiaPangHòngSàngKio̍k #車幫放送局 #LiānsianPhahchhùikó͘ #練仙Phah嘴鼓 #TSTGCP