StarTalk丨陶大宇鄭浩南相隔30多年再合作 兩人大談接拍新戲因由

StarTalk丨陶大宇鄭浩南相隔30多年再合作 兩人大談接拍新戲因由

陶大宇、鄭浩南兩位好戲之人，呢次又可以喺新戲《紥職3》再合作，兩位原來對上一次合作，已經講緊係30幾年前嘅事，日前佢哋作客《StarTalk》接受主播 詹可琳 嘅訪問，分享相隔多年再合作嘅感受。

大宇話仲記得當年同鄭浩南合作劇集《代罪羔羊》，但鄭浩南即刻糾正返係《怒火羔羊》先啱，大宇話咁就證明鄭浩南嘅記性好過自己呀。問到大宇呢次有咩吸引佢接拍呢部電影？鄭浩南即刻插嘴話「錢囉」，認真搞笑，而大宇話自己一向都係電影嘅稀客，但咁啱收到監製伍建雄電話，遊說佢話呢部電影嘅角色好有發揮，再加上又可以同老拍檔相聚，兼同未合作過嘅演員好似張繼聰、黃宗澤、陳家樂等對戲，令大宇覺得好吸引。而鄭浩南同樣好期待同未合作過嘅導演同演員合作，而最重要一點就係佢想支持番返香港嘅本土製作。

兩人除咗分享到難忘嘅場口之外，佢哋亦透露而家嘅近況，大宇話自己都係香港內地兩邊走，由於正值暑假，所以佢多咗時間返香港生活，照顧家人，希望兩邊嘅生活取得一個平衡。而鄭浩南就話自己有幾頭家，所以無話主要定居邊到，但係佢話如果要佢長住一個唔係自己出生嘅地方，佢係唔會選擇，因為佢話自己始終心繫香港。

#StarTalk #陶大宇 #鄭浩南 #詹可琳 #紥職3 #代罪羔羊 #怒火羔羊 #接拍原因 #難忘場口 #近況 #加錢呀 #TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞

即刻Follow TVB 娛樂新聞台 Facebook專頁
  / tvbenews  

登入myTV SUPER享受睇TVB自製節目7日包括娛樂新聞的免費點播
https://bit.ly/2TXLlM0