‘n Gesonde Vriendekring

Om jou eie kopie van Famielievreugde te bekom, kontak vir Suria by: [email protected]


Hierdie maand gesels ons oor ‘n gesonde vriendekring. Die waarhede en insigte wat ek deel, kom uit my boek, Familievreuge. As jy jou eie kopie wil hê of ene as ‘n geskenk vir ‘n vriendin wil gee, kontak my by [email protected].

Vandag ondersoek ons die verband tussen liefde en vriendskap, soos Jesus dit vir ons uitbeeld want sy koms na die aarde is uit liefde gebore. Dis dieselfde liefde wat Hom na die kruis geneem en uit die dood opgewek het — onvoorwaardelike, opofferende, getroue, lojale liefde. Hierdie liefde is regdeur die Bybel sigbaar. In die boek Hosea word God uitgebeeld as 'n tere, liefdevolle Vader wat 'n verbondsverhouding met sy aangenome seun, Israel, aangaan. In die Nuwe Testament bely Johannes, wat na homself verwys as die dissipel vir wie Jesus baie lief was, onomwonde, “God is liefde.” Richard Halverson verklaar:

Daar is niks wat jy kan doen dat God jou meer sal lief hê nie en daar is ook niks wat jy kan doen dat God jou minder sal liefhê nie! Sy liefde is onvoorwaardelik, onpartydig, ewigdurend, nimmereindigend en volmaak.

God se onvoorwaardelike liefde verander die landskap van die siel, is balsem vir ons rou emosies, vitamines vir ons snaarstyf senuwees en dit herfokus ons verstrooide gedagtes. Dit anker ons in die storm, lanseer ons om vreugdevol diensbaar te leef, laat hoop vry wanneer teëspoed ons wil ontspoor en gee deursettingsvermoë wanneer daar vertragings is. Kortom, God se liefde verseker n stewige fondasie. Dit is die volwasse gelowige se paspoort na n oorvloedige lewe.

Dit is hierdie goddelike liefde, wat oorvloedig lank voor die grondlegging van die wêreld reeds beskikbaar was, wat die weg baan vir Christene se liefdevolle uitreik na hul medemens. Mens kan dit nêrens beter sien uitspeel as in ons huwelike en gesinne nie, want dis hier waar dit daagliks en prakties toegepas word. Dit is daarom lewensnoodsaaklik vir gesinne om doelbewus tyd te maak om betekenisvolle verhoudinge te ontwikkel sodat ons emosioneel gesonde gesinne kan grootmaak.

God het n begeerte na boesemvriende en sielsgenote binne die mens geplaas deur ons te skape met die vermoë om blywende en liefdevolle verhoudings te bou. Dit is 'n geskenk van Hom, maar een wat ons ons kinders moet help bestuur want vriendskappe word nie verniet met hysbakke vergelyk nie! Hysbakke én vriende kan mens hoog laat klim maar ook ver laat daal. In ons gebroke wêreld waar eensaamheid hoogty vier en gesonde vriendskappe skaars is, is dit so belangrik om ons kinders te herinner aan ‘n geliefde vriend wat nader is as ‘n broer – Jesus Christus!

****
HIerdie maand daag ek jou uit om saam met die Here te droom oor ‘n werkbare stategie om jou gesin te help om sterk familiebande in elke ontwikkelingsfase en seisoen te smee. Aangesien elkeen van jou kinders uniek is, maak seker dat jou hartgesentreerde benadering hulle ontmoet waar hulle is.