ဒေါ်အောင်ဆန်းစုကြည်ကို ရန်သူတော်နံပါတ်တစ်သဖွယ် စစ်ခေါင်းဆောင် ဘာလို့ သဘောထားရလဲ - BBC News မြန်မာ

ဒေါ်အောင်ဆန်းစုကြည် - ပြန်လည်သင့်မြတ်ရေးလမ်း လိုက်ခဲ့ပေမဲ့ စစ်တပ်ရဲ့ ရန်သူတော် နံပါတ်တစ် အဖြစ် သဘောထားခံရသူ၊ အာဇာနည်နေ့ အထူးမေးမြန်းခန်း

၁၉ ဇူလိုင် အာဇာနည်နေ့ အခါသမယမှာ အာဏာသိမ်းပြီးနောက်ပိုင်း ကတည်းက အာဇာနည်နေ့ အပါအဝင် လူအများ မြင်ကွင်းကနေ ဖျောက်ခံထားရတဲ့ လူထုခေါင်းဆောင် ဒေါ်အောင်ဆန်းစုကြည်နဲ့ စပ်လျင်းတဲ့ အကြောင်းကို ဒီတစ်ပတ် သတင်းမြင်ကွင်း အစီအစဥ်မှာ ဆွေးနွေးထားပါတယ်။

ဒေါ်အောင်ဆန်းစုကြည်ဟာ စေ့စပ်ရေးလမ်း၊ အမျိုးသား ပြန်လည် သင့်မြတ်ရေး လမ်းကို ဘယ်လိုပဲ လိုက်ခဲ့ လိုက်ခဲ့ .... စစ်တပ်ကတော့ သူ့အပေါ်မှာ နံပါတ်တစ် ရန်သူ အဖြစ် သဘောထားတာကတော့ ထင်ရှားတယ် ဆိုပြီး အကဲခတ် တော်တော်များများက ပြောကြပါတယ်။

ဒီတစ်ခေါက် တကျော့ပြန် အာဏာသိမ်းပြီးနောက်မှာ ဒေါ်အောင်ဆန်းစုကြည် အပေါ် လက်ရှိ စစ်ခေါင်းဆောင်နဲ့ သူ့ရဲ့ နောက်လိုက်တွေရဲ့ ဆက်ဆံပုံဟာ အရင် စစ်အစိုးရတွေ လက်ထက်တွေကထက် အဆမတန် ပိုပြီး ပြင်းထန် ရက်စက်လှတယ် ဆိုတဲ့ ဆန်းစစ်ချက်တွေ ရှိပါတယ်။

စွပ်စွဲချက် အမျိုးမျိုးနဲ့ နှစ်ရှည် ထောင်ဒဏ်တွေ ချတာ (အမှုဆင်တာတွေဟာ အဓိပ္ပာယ်မဲ့လှလို့ “all absurd” ဆိုပြီး တရားရုံးမှာ ဒေါ်အောင်ဆန်းစုကြည် နှုတ်က ထွက်ခဲ့တယ်ဆိုတဲ့ သတင်းမျိုး အပြင်ကို ရောက်လာဖူးပါတယ်) .... ပြင်ပကမ္ဘာနဲ့ လုံးဝ အဆက်အသွယ် ဖြတ်ထားတာက အစ၊ ဒေါ်အောင်ဆန်းစုကြည် ဦးဆောင်တဲ့ NLD ပါတီကို ဖျက်တာ .... သမိုင်းဝင် အမှတ် ၅၄ တက္ကသိုလ်ရိပ်သာလမ်း နေအိမ်ကိုပါ လေလံတင် ရောင်းဖို့ ကြိုးစားနေတာမျိုးတွေနဲ့ အဆုံးစွန် လုပ်ဆောင်ပါတယ်။

ဒီကြားထဲကပဲ စစ်တပ်ရဲ့ နောက်ထပ် ခြေလှမ်းတွေမှာ ဒေါ်အောင်ဆန်းစုကြည်ရဲ့ အခန်းကဏ္ဍ ပါဝင်လာနိုင်သေးလား ဆိုတာနဲ့ ပတ်သက်ပြီး မတူတဲ့ ယူဆချက် နှစ်မျိုး ရှိပါတယ်။ ပထမတစ်ခုကတော့ စစ်တပ်ကိုင်ထားတဲ့ bargaining chip လို့ပဲ ခေါ်ခေါ်၊ နိုင်ဖဲ လို့ပဲ ခေါ်ခေါ် နိုင်ငံရေးအရ တန်ဖိုး အကြီးဆုံးကတော့ ဒေါ်အောင်ဆန်းစုကြည်ပဲ ဖြစ်တယ် ဆိုတဲ့ အမြင်မျိုးပါ။ တစ်ချိန်ချိန်မှာတော့ ဒေါ်အောင်ဆန်းစုကြည်ကို ထုတ်သုံးလာနိုင်သေးတယ် ဆိုတဲ့ မှန်းဆချက် ဖြစ်ပါတယ်။

နောက်တစ်ခုကတော့ .... ဒေါ်အောင်ဆန်းစုကြည်ရဲ့ နိုင်ငံရေး အခန်းကဏ္ဍကို အပြီးတိုင် ပြည်ဖုံးကားချနိုင်ဖို့ စစ်တပ်က စိတ်ပိုင်းဖြတ်ထားပြီးပြီ .... တရုတ်၊ ရုရှားတို့ရဲ့ ... အထူးသဖြင့် တရုတ်ရဲ့ ကျောထောက်နောက်ခံပေးမှုနဲ့ စစ်တပ်ဟာ ရွေးကောက်ပွဲ အပါအဝင်၊ သူတို့ကိုယ်ပိုင် လမ်းပြမြေပုံ Road Map အတိုင်းပဲ သွားတော့မယ် ... ဆိုတဲ့ အယူအဆ ဖြစ်ပါတယ်။

ဒီတစ်ပတ်မှာတော့ ဒေါ်အောင်ဆန်းစုကြည် အပေါ် လက်ရှိ စစ်ခေါင်းဆောင် ထားရှိတဲ့ သဘောထား အပေါ် အဓိက ဆန်းစစ်နိုင်ဖို့ရာ၊ ဒေါ်အောင်ဆန်းစုကြည် အသက် ၈၀ ပြည့်တုန်းက ဘီဘီစီ စကားပြောခဲ့တဲ့ သတင်းစာ ဆရာ၊ ဗုဒ္ဓဘာသာ ဘုန်းတော်ကြီး လူထွက် အလန်ကလဲမန့်စ်ကိုပဲ အခုတစ်ပတ် ပြန်ပြီး ဖိတ်ခေါ်ထားပါတယ်။ သူဟာ ဒေါ်အောင်ဆန်းစုကြည်ရဲ့ ဘဝ အဘိဓမ္မာ အမြင်တွေ၊ ဗုဒ္ဓဓမ္မနဲ့ ယှဥ်ပြီး နိုင်ငံရေး အတွေးအခေါ်တွေကို ကျယ်ကျယ်ပြန့်ပြန့် တည်ဆောက်ထားပုံတွေ အကြောင်း “မျှော်လင့်ခြင်းရဲ့ အသံ” ဆိုတဲ့ နာမည်နဲ့ စာအုပ် ရေးသားခဲ့သူ ဖြစ်ပါတယ်။

ဒါ့အပြင် မြန်မာ့ဒီမိုကရေစီ တံခါးဖွင့်ကာလ လို့ ရည်ညွှန်းလေ့ ရှိတဲ့ ဦးသိန်းစိန် အစိုးရလက်ထက်၊ ဒေါ်အောင်ဆန်းစုကြည် ဦးဆောင်တဲ့ NLD အစိုးရလက်ထက်တွေမှာ မြန်မာနိုင်ငံထဲမှာ အချိန်များစွာယူပြီး နိုင်ငံရေး အသိုင်းအဝိုင်း အကြောင်း အသေအချာ လေ့လာဆန်းစစ်ခဲ့သူ၊ စာအုပ်တွေ အတွဲလိုက် ရေးသားခဲ့သူ ဖြစ်ပါတယ်။

အခုလည်းပဲ လက်ရှိ အာဏာသိမ်း စစ်ခေါင်းဆောင်နဲ့ သူ အချီအချ စကားပြောသလိုမျိုး ရေးသားထားတဲ့ စာအုပ် လောလောလတ်လတ်ပဲ ထုတ်ဝေထားပါတယ်။ သူ့ဆီက နိုင်ငံရေးအရ သုံးသပ်ချက် ဆိုတာမျိုးထက် စာရင် ဘာသာရေး လမ်းကြောင်း၊ ဘဝ ဒဿန လမ်းကြောင်း တွေကနေ ချဉ်းကပ်ပုံတွေကို ကြားကြရမှာ ဖြစ်ပါတယ်။

ဘီဘီစီသတင်းထောက် ကိုဝေဖြိုး စီစဥ် တင်ဆက်ထားတာကို ဇူလိုင် ၁၉ ရက် စနေ အာဇာနည်နေ့၊ မြန်မာစံတော်ချိန် ည ၈ နာရီအချိန်မှာ ဘီဘီစီမြန်မာပိုင်းရဲ့ ဖေ့စ်ဘုတ် စာမျက်နှာနဲ့၊ ည ၈နာရီခွဲ အချိန် ဘီဘီစီမြန်မာပိုင်းရဲ့ ယူကျုချန်နယ်တို့ကနေ ထုတ်လွှင့်ပေးမှာမို့ စောင့်မျှော် ကြည့်ရှု နိုင်ကြပါတယ်။ #ဘီဘီစီမြန်မာပိုင်း #သတင်းမြင်ကွင်း