"КУЙДИ ЖОНИМ" – Шерали Жўраев ва Холиқ Хурсандов қўшиқлари

БИР ШЕЪР – ИККИ ҚЎШИҚ
Ўзбекистон халқ шоири Усмон Азим улуғ адиб Шукур Холмирзаевнинг илтимосига биноан "Куйди жоним..." шеърини ёзган. Ёзувчи шеърни асарига киритишни режалаштирган. (Бу ҳақида шоирнинг "Сўнгсўзлар" китобидан ўқиб олишингиз мумкин.) Усмон Азим эса бу шеърни на бирор китобига киритган, на матбуотда эълон қилган. Шеър аввал Холиқ Хурсандов, сўнг Шерали Жўраев томонидан куйга солинган.

Менга бердинг осмоннинг бир тиниғини,
Тошлар отдинг, териб олдим синиғини,
Қаҳратоннинг қатронини мен тортдим, ёр,
Ағёр билди сўзларингнинг илиғини.
Куйди жоним, куйди менинг жоним куйди,
Бевафо ёр бизни қўйиб кимни суйди?

Келганингда дарё бўлиб оққан эдим,
Дарёлардан юлдуз бўлиб боққан эдим.
Ағёр билан нега бундай турибсан ёр,
Қуёшим деб сени ўзим ёққан эдим.
Куйди жоним, куйди менинг жоним куйди,
Бевафо ёр бизни қўйиб кимни суйди?

Бевафо ёр чарақлаган кундан гапир,
Кун тугади, келаётган тундан гапир.
Иккимиз бир қизил гулга кўнгил қўйдик,
Гулимизни кимга бердинг, шундан гапир.
Куйди жоним, куйди менинг жоним куйди,
Бевафо ёр бизни қўйиб кимни суйди?

Бу дунёнинг туришини тоғдан сўра,
Келишини-кетишини боғдан сўра.
Сен-ку кетдинг ўйнаб-кулиб аламли ёр,
Куйганимни кўксимдаги доғдан сўра.
Куйди жоним, куйди менинг жоним куйди,
Бевафо ёр бизни қўйиб кимни суйди?

Усмон АЗИМ
Ўзбекистон халқ шоири
----------------------------------------------------------------------------------------------
BIR SHE'R – IKKI QOʼSHIQ
Oʼzbekiston xalq shoiri Usmon Аzim ulugʼ adib Shukur Xolmirzaevning iltimosiga binoan "Kuydi jonim..." sheʼrini yozgan. Yozuvchi sheʼrni asariga kiritishni rejalashtirgan. (Bu haqida shoirning "Soʼngsoʼzlar" kitobidan oʼqib olishingiz mumkin.) Usmon Аzim esa bu sheʼrni na biror kitobiga kiritgan, na matbuotda eʼlon qilgan. Sheʼr avval Xoliq Xursandov, soʼng Sherali Joʼraev tomonidan kuyga solingan.

Menga berding osmonning bir tinigʼini,
Toshlar otding, terib oldim sinigʼini,
Qahratonning qatronini men tortdim, yor,
Аgʼyor bildi soʼzlaringning iligʼini.
Kuydi jonim, kuydi mening jonim kuydi,
Bevafo yor bizni qoʼyib kimni suydi?

Kelganingda daryo boʼlib oqqan edim,
Daryolardan yulduz boʼlib boqqan edim.
Аgʼyor bilan nega bunday turibsan yor,
Quyoshim deb seni oʼzim yoqqan edim.
Kuydi jonim, kuydi mening jonim kuydi,
Bevafo yor bizni qoʼyib kimni suydi?

Bevafo yor charaqlagan kundan gapir,
Kun tugadi, kelayotgan tundan gapir.
Ikkimiz bir qizil gulga koʼngil qoʼydik,
Gulimizni kimga berding, shundan gapir.
Kuydi jonim, kuydi mening jonim kuydi,
Bevafo yor bizni qoʼyib kimni suydi?

Bu dunyoning turishini togʼdan soʼra,
Kelishini-ketishini bogʼdan soʼra.
Sen-ku ketding oʼynab-kulib alamli yor,
Kuyganimni koʼksimdagi dogʼdan soʼra.
Kuydi jonim, kuydi mening jonim kuydi,
Bevafo yor bizni qoʼyib kimni suydi?

Usmon АZIM
Oʼzbekiston xalq shoiri