Ежелгі Жібек жолы бойындағы тарихи шаһарларды ЮНЕСКО тізіміне енгізу қажет

Бүгін Сыр өңірінде өткен Қазақстанның ЮНЕСКО жөніндегі ұлттық комиссиясының отырысында осындай бастама жасалды.

Бұл басқосуға халықаралық ұйымның Ұлыбритания, Франция, Жапония, Бельгия елдерінің халықаралық сарапшылары мен Қытай, Қырғызстан, Өзбекстан, Тәжікстан елдерінен өкілдер қатысты.

Мамандардың айтуынша,«Жібек жолы: Ферғана-Сырдария дәлізі» жобасы негізінде Тәжікстан, Қырғызстан, Өзбекстан және біздің елдегі ескі қалалар зерттеледі.

Ұлы Жібек жолы – Қытай жерінен басталып, Қиыр Шығыс пен Еуропа елдеріне беттеген керуен жолы. Бұл жолдың басым бөлігі Орталық Азия мен Қазақстан жерінің үстімен өтеді. Әсіресе Сырдария өзенінің бойында орналасқан қалалар көп болған.

Сараптамалық кездесуге ұсынылған 16 ескерткіштің тең жартысы Қызылорда облысының аумағында.

Карл Байпақов, «Ұлы Жібек жолы» Қазақстан ұлттық комитетінің мүшесі

-Соңғы 5 жылда елімізде үлкен қозғалыс бар. Көптеген қалалардың орны табылды. Мәселен, Арал теңізінің табанында да бір замандары адамдар тіршілік еткендігі анықталып отыр. Бұл жұмыстарды жалғастыра түсуіміз қажет. Жалпы Тәуелсіздік жылдарындағы жұмыстарды жоғары бағалауға болады.