Асхат Аймағамбетов: «Магистратура мен докторантураға түсуге кедергі болмауға тиіс»

Мәжіліс депутаты, «AMANAT» партиясы фракциясының мүшесі Асхат Аймағамбетов магистратура мен докторантураға түсу тәртібін өзгерту мәселесі бойынша депутаттық сауал жолдады.

Оның айтуынша, бекітілген талап бойынша, магистратураға түсу үшін талапкерлер ағылшын тілінен емтихан тапсыруға міндетті. Оқу қазақ немесе орыс тілінде жүргізілсе де, бұл талап – бәріне ортақ. Алайда қазір жағдай өзгерді.

«Біз бес жыл ішінде жасанды интеллект дәуіріне қадам бастық. Технологиялық революция орын алды. Қазір ChatGPT, Gemini сияқты құралдардың көмегімен кез келген ағылшын тіліндегі мәтінді санаулы секундта қазақ немесе өзге тілдерге өте сапалы түрде аударуға мүмкіндік бар. Иә, ағылшын тілі ғылым үшін, жалпы еліміздегі әр азамат үшін өте қажет. Болашақта да қажет болады. Бірақ қазіргі технологиялардың дамуын ескерсек, бұл талап магистратура мен докторантураға түсуге кедергі болмауға тиіс. Өйткені енді осы технологиялармен, жастар ғылыми жұмысын жүргізе алады», – деді депутат.