فن المجرور للشاعرين مطر الدلبحي و تركي السلات-في مدح الشيخ بدر بن ماجد بن عميره -اداء عبدالله نعيم

الشاعر/ مطر محيديد الدلبحي الروقي
-
ياسلامي على اللي فاز بالطيب كله
( راعي الطيب كله )
ابن ماجد تليد المجد ساس الاماره
( عاش ساس الاماره )
بدر جعل المنايا يم غيره تزله
( يم غيره تزله )
العديم السنافي عز ضيفه وجاره
( عز ضيفه وجاره )
اشتهر بين خلق الله بطيب الجبله
( حيها من جبله )
راسمً للعلا بين النشاما مساره
( ماتغير مساره )
الله اللي عطاه الجاه وهبه من الله
( جاه وهبه من الله )
وأصبح مقدرٍ بين النشاما وقاره
( حق يحفظ وقاره )
من سلايل عقاب الخيل للقوم عله
( للمعادين عله )
دون حد القبيله للعداء شب ناره
( للعداء شب ناره )
من سلايل شيوخٍ كل عقدٍ تحله
( كل عقدٍ تحله )
اسمهم بينن بين العرب فالصداره
( وهمه اهل الصداره )
العميرات والتاريخ يكتب اسجله
( لين يملى سجله )
مدخلين الجلاوي عقب خلى دياره
( لين ياصل دياره )
دايم بيوتهم للي زبنهم مضله
( للفداوي مضله )
قبل وقت الامان وقبل وقت الحضاره
( قبل دور الحضاره )
سلم الاد المغير يوم كلن ودلّه
( يوم كلن ودلّه )
الظفر ورث اهلهم رافعينٍ شعاره
( ماينزّل شعاره )
—————————
—————
مجاراة الشاعر/ تركي سليم السلات العطاوي العتيبي
-
كن بعض البيوت إن مر فنجال دله
( مثل فنجال دله )
عند عودٍ معاميله بجال المناره
( فوق ضوء المناره )
عقب حمسه ودقه فاح بنه وزلّه
( فاح بنه وزلّه )
وإذعره بالعويدي ثم كثر بهاره
( يوم فوّح بهاره )
ومده الشايب اللي مجلسه ماتملّه
( شايبٍ ماتملّه )
وان حكا يثري السامع ويحفظ وقاره
( ماينزّل وقاره )
مثل قافك يابومنصور هذا بحلّه
( قاف جاين بحلّه )
وفيه ياشاعر الابداع فن ومهاره
( بدع فن ومهاره )
تطرد الهزل من بدعك وبالك يزلّه
( والجزل مايزلّه )
مثل طردتك للي سامو ام الحواره
( لجل عين الحواره )
وان مدحت المديح اللي ربوعه تجلّه
( كل طيب يجلّه )
للمجاراه هجوسي تحت رهن الاشاره
( ماتحرا الاشاره )
بدر ابن ماجد ابن عميره اللي محلّه
( فالصداره محلّه )
وذخر ماجد حفيد عقاب جود ونعاره
( شيخ جود ونعاره )
العميرات مثل الدوله المستقلّه
( دولة(ن) مستقلّه )
فالمناويخ ولا صد غاره بغاره
( صد غاره بغاره )
في نهار المثارا خضبوا كل سلّه
( واللحموا كل سلّه )
بين خشم السناف وبين خشم الزباره
( عند خشم الزباره )
الثرى فعلهم بدمي الأعداء يعلّه
( عقب يروى يعلّه )
في نهارن كتم صدر الثريا غباره
( يوم ثوّر غباره )
وان غزوا في نحاهم شالو البوش كله
( قفوا البوش كله )
وعزلهم كل مضياح(ن) عليها غياره
( لبسوها غياره )