ჩინეთი სადავო კუნძულებთან სამხედრო ბაზას აშენებს

ჩინეთის ხელისუფლება სამხრეთ ჩინეთის ზღვის სადავო კუნძულებთან სამხედრო ბაზას აშენებს. სამხედრო ბაზა სენკაკუს კუნძულებიდან 300 კილომეტრში მდებარეობს, რომელსაც იაპონია თავის ტერიტორიად მიიჩნევს.

მშენებლობის მიზანი რეგიონში ჩინეთის სამხედრო შესაძლებლობებისა და საჰაერო თავდაცვის ზონაზე ზედამხედველობის გაძლიერებაა.

სამხედრო ბაზა, იაპონიის კუნძულ ოკინავასთან შედარებით, სადავო კუნძულებთან 100 კილომეტრით უფრო ახლოს მდებარეობს.

გავრცელებული ინფორმაციით, პეკინმა ბაზაზე უკვე რამდენიმე ასაფრენი ბილიკი მოაწყო.

სამხრეთ ჩინეთის ზღვის კუნძულებზე უთანხმოება მას შემდეგ დაიწყო, რაც 2012 წელს იაპონიამ ერთ-ერთი კუნძული კერძო მესაკუთრისგან შეიძინა.

გამოკითხვების მიხედვით, ჩინელების უმრავლესობა, ბუნებრივი რესურსებით მდიდარი კუნძულების გამო, იაპონიასთან ომის დაწყებას 2020 წლისათვის ვარაუდობს.