မြန်မာပြည်သစ် တည်ဆောက်ရေးမှာ လူမျိုးအခြေပြု အမျိုးသားရေးဝါဒ Ethnonationalism ဘာ့ကြောင့် အရေးကြီးသလဲ

အာဏာသိမ်းစစ်ခေါင်းဆောင်ရဲ့ ယူနန်ပြည်နယ် ခရီးစဥ် အထမြောက်လာတဲ့ အတွက် မြန်မာစစ်တပ် အနေနဲ့ နိုင်ငံရေးအရ အတော်အတန် အသက်ရှု ချောင်သွားတယ်လို့ ပြောနိုင်ပေမယ့်၊ စစ်ရေး အရ ကြည့်ရင်တော့ အရှေ့မြောက်တိုင်း စစ်ဌာနချုပ် ရမခ တစ်ခုလုံး လားရှိုးမှာ လက်လွှတ်ထားရတဲ့ အချက် မပြောင်းလဲသေးသလို၊ ရခိုင်ထဲက အမ်း အခြေစိုက် အနောက်ပိုင်းတိုင်း စစ်ဌာနချုပ်ရဲ့ လက်ရုံးတပ်အများစုလည်း အရက္ခတပ်တော် အေအေရဲ့ လက်ထဲ ရောက်သွားပြီလို့ မြေပြင်သတင်းတွေက ဆိုပါတယ်။

အခုတစ်ပတ်မှာတော့ မြန်မာနိုင်ငံထဲက တိုင်းရင်းသားတွေ ဆင်နွှဲနေကြတဲ့ လက်နက်ကိုင် တော်လှန်ရေးရဲ့ သဘောသဘာဝနဲ့ ရှေ့ရေးအလားအလာ အကြောင်း သုံးသပ် ဆွေးနွေးသွားမှာ ဖြစ်ပါတယ်။ အထူးသဖြင့် လူမျိုး အခြေပြု အမျိုးသားရေး ဝါဒ Ethnonationalism အကြောင်း အာရုံစိုက် သုံးသပ်ရင်းမှာပဲ၊ မြန်မာနိုင်ငံရေးရဲ့ အနှစ် ၇၀ ကျော်ကြာ လက်နက်ကိုင် ပဋိပက္ခ ဖြေရှင်း ချုပ်ငြိမ်းနိုင်ဖို့ ဆိုရင် တိုင်းရင်းသား လူမျိုးတွေ အရေး ဖြေရှင်းဖို့ရာ ဘာဖြစ်လို့ အခရာကျ အရေးကြီးရသလဲ ဆိုတာကို ဆွေးနွေးသွားမှာ ဖြစ်ပါတယ်။

ဒီတော့ .... အခုလို စစ်ရေးနည်းနာ အားကောင်းပြီး တိုင်းရင်းသား လက်နက်ကိုင် တပ်တွေ အနေနဲ့ နယ်မြေတွေ ကျယ်ကျယ်ပြန့်ပြန့် ထိန်းချုပ်လာနိုင်တာမျိုး အောင်မြင်မှုတွေ ရနေချိန်၊ တပြိုင်တည်းမှာပဲ .... ပိုမိုကောင်းမွန်တဲ့ နိုင်ငံရေး တည်ဆောက်မှုတွေကိုပါ တပါတည်း ယှဥ်တွဲ လုပ်ဆောင်နေကြလား .... ပြည်ထောင်စု ပုံစံသစ်ကို ဘယ်လိုဘယ်ပုံ တည်ဆောက်နိုင်မလဲ ... စတဲ့ အရေးကြီးတဲ့ အကြောင်းချင်းရာတွေကို သုံးသပ်သွားဖို့ ရှိပါတယ်။

ဒီတစ်ပတ် ပါဝင်ဆွေးနွေးကြသူတွေကတော့ မြန်မာနိုင်ငံထဲက တိုင်းရင်းသား လူမျိုးတွေရဲ့ လက်နက်ကိုင် တော်လှန်ရေး အကြောင်း အထူးပြု လေ့လာတဲ့ ယူကေနိုင်ငံ၊ ဆပ်ဆက်စ် တက္ကသိုလ်က အကြီးတန်း ကထိက ဒေါက်တာ ဒေးဗစ် ဘရင်နာနဲ့၊ ပညာရေးနဲ့ ဖွံ့ဖြိုးရေး ဆိုင်ရာ နိုင်ငံတကာ ဖောင်ဒေးရှင်း အဖွဲ့ FED ရဲ့ အကြီးတန်း အကြံပေး အဖြစ် လက်ရှိ လုပ်ကိုင်နေတဲ့ မြန်မာ့ နိုင်ငံရေး သုံးသပ်သူ ဒေါက်တာ စိုင်းကြည်ဇင်စိုးတို့ ဖြစ်ပါတယ်။

ဘီဘီစီသတင်းထောက် ကိုဝေဖြိုး စီစဥ် တင်ဆက်ထားတာကို နိုဝင်ဘာလ ၉ ရက်၊ စနေည မြန်မာစံတော်ချိန် ည ၈ နာရီမှာ ဘီဘီစီမြန်မာပိုင်းရဲ့ ဖေ့စ်ဘုတ်စာမျက်နှာနဲ့၊ ည ၈ နာရီခွဲ အချိန် ဘီဘီစီမြန်မာပိုင်းရဲ့ ယူကျုချန်နယ်တို့ကနေ ထုတ်လွှင့်သွားမှာမို့ စောင့်မျှော်ကြည့်ရှုနိုင်ကြပါတယ်။ #ဘီဘီစီမြန်မာပိုင်း #သတင်းမြင်ကွင်း