Жаңа Жылға арналған ертеңгілік «Мейірім мекені» ана мен бала орталығында ерекше өтті

Жаңа Жылға арналған ертеңгілік «Мейірім мекені» ана мен бала орталығында ерекше өтті. Балаларға арналған мерекеде RAMS компаниясы келушілерге сыйлықтар табыстады. Сондай-ақ, орталыққа қажетті спорттық құрал-жабдықтар тарту етті. Компанияның бұл қолдауы - тек сыйлық емес, жеткіншектерге көрсетілген қамқорлық пен мейірімнің айқын көрінісі.
Жаңа Жыл - жүрекке жылу сыйлайтын жарқын мереке. Осы бір шуақты сәтті «Мейірім мекені» ана мен бала орталығындағы бүлдіршіндер биыл ерекше қуанышпен қарсы алды. RAMS компаниясы ұл-қыздарға арналған Жаңа жылдық ертеңгілікте балаларға сыйлықтар табыстап, орталықты шаттық пен қуанышқа бөледі.
НҰРСҰЛТАН ҚАБИЕВ, "МЕЙІРІМ МЕКЕНІ" ана мен бала орталығының директоры:
Орталығымыз жалпы 5 жыл атқара келеді. Қазір 23 ана, 70 бала бар. Жыл сайын осындай Жаңа жылдық мереке, Наурызға мерекелік іс-шараларды өткізіп отырамыз. Сол мерекелерімізде әрдайым бізді, балаларымызды қуантып келетін осы Рамс компаниясының ұжымына алғысымыз шексіз.
RAMS «Мейірім мекеніне» жыл сайын тұрақты қолдау көрсетіп келеді. Бірнеше жыл бұрын компания орталықтағы отбасылардың біріне баспана сыйласа, биыл балалардың игілігіне бағытталған тағы бір игі істі жүзеге асырды. Спорт бөлмесін толық жабдықтап, қажетті құралдарды тарту етті.
ГАУХАР ӘБДІКӘРІМОВА, "МЕЙІРІМ МЕКЕНІ" ана мен бала орталығының тұрғыны:
Мен бұл жерге 1 жыл болды келгеніме. 5 қызым бар, жолдасым қайтыс болған. Қайрат ағаға, Нұрсұлтан мырзаға үлкен рақмет ана мен балаларды паналарына алып, жылы жерде ұстап отырғанына. Бүгінгі Жаңа жылымыз керемет өтті. Балаларымыздың бәрі қуанып, сыйлықтарын алып. Өзіміз де, аналар да күшті көңіл-күйдеміз.
Жаңа жыл қарсаңындағы игі іс тек орталықтағы мерекемен шектелмеді. RAMS компаниясы "игі істер" қайырымдылық акциясын өткізіп, қиын жағдайда қалған 200-ден астам балаға мерекелік сыйлықтар табыстады. “Әділ” қайырымдылық қорымен бірге Есік қаласындағы «Есеновтер үйі», Мұхамеджан Түймебаев ауылындағы «Дом Надежды» орталығын, сондай-ақ Ұзынағаш пен Шиендегі интернаттарды аралап, балаларға ойын-сауық бағдарламаға толы мерекелік кештер ұйымдастырған. Сонымен қатар бірнеше уақыттан бері демеуші таба алмаған жеткіншекке де қолдау көрсетті. Туғаннан қозғалысы шектеулі Таирге арнайы арба табыстап, анасына үлкен қуаныш сыйлады.



#Информбюро #31арна #БастыЖаңалықтар #Новости #31канал