8 milyonları mənimsənən sakinlər prezidentə müraciət edirlər

10 ildən çoxdur bu bataqlığın yerində bina inşa edilməli, onlar da öz mənzillərinə qovuşmalı idilər. Söhbət aldadılmış 279 sakindən gedir.
“Camaatın dələduzlarda olan pulu 8 milyon manatdır”, - deyə Namiq İsrafilov vurğulayır.
2007-2008-ci illərdə Həzi Aslanov metrostansiyası yaxınlığında “Birlik” MMC-yə məxsus yarımçıq tikililərdən mənzil alan sakinlər nə evlərindən, nə də pullarından bir xəbər ala bilir. 2011-ci ildə eyni mənzillərin 4-5 müxtəlif adama satıldığı məlum olanda MTK sahiblərinə cinayət işi açılır. Korrupsiyaya qarşı mübarizə idarəsindən sakinlərə bildirilib ki, bu işdə öhdəlik götürmüş şəxslər Xırdalanda bina tikib onlara təhvil verəcəklər.
“İş adamı İsfəndiyar müəllimə verdilər. Bu camaatla birgə İsfəndiyarın ofisinə getdik. Hamını qeydiyyatdan keçirib, tez bir zamanda binanı təhvil verəcəklərini dedilər. Sonra məlum oldu ki, bunlar verdikləri vədə əməl etmirlər, ancaq vaxt udurlar”, - Şirazi İbişov deyir.
Ancaq Şərur MTK-nın əməkdaşı Meydan TV-yə bildirib ki, 2018-ci ildə 2-3 ay danışıqlar getsə də, razılaşma əldə edilməyib. Şərur MTK bu binanın tikintisi ilə məşğul olmur.
“Sonra da deyirlər ki, camaat müxalifətə yönlənir, dövlətə qarşı çıxır. Elə bu məmurlardır, Korrupsiyaya Qarşı mübarizə İdarəsidir ki, camaatı məcbur edir. Hər yerə əl atmışıq. Görün nə vəziyyətə çatmışıq ki, mən bir dəfə istədim çıxım binanın üstündən özümü atım”, - Namiq İsrafilov dilə gətirir.
“Birlik” MMC-nin rəhbəri Elman Tağıyev Bakı Ağır Cinayətlər Məhkəməsinin hökmü ilə 14 il 6 ay müddətinə azadlıqdan məhrum edilib. Ancaq Bakı Apelyasiya Məhkəməsi hökmü dəyişərək cəzasını 5 il 6 aya endirib. Sakinlər deyir ki, qətnamədə onların guya mənzillə təmin olunduğu qeyd olunub. Zərərçəkənlərin şikayətindən sonra isə qətnamə ləğv olunub, iş yenidən baxılması üçün Apelyasiya Məhkəməsinə göndərilib. Zərərçəkənlərinsə əsas tələbi mənzillə təmin olunmaq, ya da ödədikləri pulun qaytarılmasıdır.
“33 min 700 manat ödəyib müqavilə bağlamışam. İndiyə kimi nə pulum, nə evim var. Küçələrdə qalmışıq. Arzularımızı öldürdülər, bütün həyatımızı məhv etdilər “maşenniklər”. Hökumətimiz görmür, bilmir ki, bu “maşenniklər” kimdir? Korrupsiya İdarəsinə gedən kimi deyir: “Bizim vəzifəmiz onu həbs etməkdir”. Yəni tutmaqla iş bitir? Deməli, bizim qanunlarımız yoxdur?, - deyə Sahibə Qafarova sual edir.
Aldadılan sakinlərlə yanaşı Xırdalandakı ərazinin sahibi də 12 ildir gözləmədədir. 60 yaşlı Cahangir Xalıqova məxsus torpaq sahəsində “Birlik” MMC-nin rəhbəri Elman Tağıyevin qohumu Bakir adlı şəxslə 2007-ci ildə bina inşa etmək üçün müqavilə bağlayıblar. Şərtlərə görə ona bu tikilidən 5 mənzil verilməli idi.
“Mən də indi qalmışam belə. Özüm də yaşlı adamam, xəstəyəm. Kiçik oğlum da ki, artıq 7 ildir nişanlıdır. Mən bir yer tapıb adamı gətirə bilmirəm. Biz Prezident Administrasiyasına da getmişik, Korrupsiyaya Qarşı Mübarizə İdarəsinə də. Heç bir nəticəsi yoxdur”, - Cahangir Xalıqov deyir.
Prezident Administrasiyasından tutmuş Korrupsiyaya Qarşı Mübarizə İdarəsinəcən dövlət qurumlarını qapı-qapı gəzib bir nəticəyə varmayan vətəndaşlar səslərini prezidentə duyurmaq istəyirlər.
"Bu məmurlar, fırıldaqçı iş adamları bizi hökumətə qarşı qaldırırlar. Bugünkü gün yaşadığımıza görə xəcalət çəkirik. Sizdən xahiş edirəm, cənab prezident, bizim işimizə nəzarət edin. Bu gün burada olan insanların çoxu kirayələrdə yaşayır. Hamının vəziyyəti acınacaqlıdır. Bir iş adamı bizi aldadacaq, siz buna laqeyd qalacaqsız? Belə olmaz axı”, - Şirazi İbişov deyir.
Elman Tağıyevin adı mətbuatda “Xəmsə” MMC, “Birlik-İnşaat” MMC və “Hayan-E” MMC şirkətləri vasitəsilə payçıların pullarını mənimsəməklə gümdəmə gəlib. Zərərçəkənlərin və Elman Tağıyevin aqibəti fevralın 7-də Bakı Apelyasiya Məhkəməsində bəlli olacaq.

Kanala abunə ol - https://goo.gl/TcM9Fm

WebSite: http://www.meydan.tv
Facebook: http://fb.com/MeydanTelevision
Twitter:   / meydantv  
Google+ https://plus.google.com/+MeydanTelevi...
İnstagram:   / meydantv  

__
Xəbərdən çox xəbər var. Çəkin göndərin yayımlayaq - whatsapp : +49 176 16263646